Навагодняя дабрачынная акцыя «Нашы дзеці» праходзіць у Беларусі штогод ужо больш за 28 гадоў. Яе галоўная мэта заключаецца ў тым, каб сфакусаваць увагу рэспубліканскіх, мясцовых, выканаўчых, распарадчых дзяржорганаў, грамадскіх аб'яднанняў на дзецях, якім трэба аказаць дапамогу, а таксама заахвоціць найбольш годных, таленавітых дзяцей, якія дасягнулі поспеху ў вучобе, спорце, грамадскім жыцці.
Адкрыццё прайшло ў Цэнтры творчасці дзяцей і моладзі «Світанак».
- Паважаныя прысутныя! Вельмі прыемна бачыць сёння ў гэтай зале шмат прыгожых і шчаслівых твараў, - з прывітальным словам звярнуўся да гасцей мерапрыемства Старшыня Пухавіцкага райвыканкама Андрэй Атрушкевіч. - Штогадовая акцыя «Нашы дзеці» праходзіць па ўсёй краіне, пачынаючы ад сталіцы і заканчваючы маленькімі вёскамі. У рамках акцыі запланаваны шматлікія цэнтралізаваныя паказы, ранішнікі, экскурсіі, а таксама збор сродкаў і прадметаў першай неабходнасці для дзяцей, якія апынуліся ў цяжкай жыццёвай сітуацыі.
Затым прайшоў яркі канцэрт з інтэрактыўнымі гульнямі, вакальнымі і танцавальнымі нумарамі, які падрыхтавалі выхаванцы Цэнтра творчасці дзяцей і моладзі «Світанак». У канцы ўсе дзеці атрымалі святочныя наборы ад ААТ «Машхарчпрад».
Станіслаў Белавусаў.