Дзіўная зямля Пухаўшчыны – край старажытных паданняў і легенд, працавітых і таленавітых людзей! Нейкая асаблівая дабрыня і мудрасць зыходзіць ад гэтай прасторнай зямлі з незвычайнымі чорнымі бярозамі, цудоўнымі азёрамі і рэкамі. Само жыццё падказала прыродзе, што менавіта Пухаўшчына з'яўляецца цэнтрам Рэспублікі Беларусь. У 1996 годзе, 31 мая, паблізу вёскі Антонава Навасёлкаўскага сельсавета быў устаноўлены спецыяльны геадэзічны знак, які сведчыць аб гэтай важнай падзеі.
Знаходжанне цэнтра Беларусі на Пухаўшчыне – гэта не толькі гонар жыхароў за свой унікальны куток, але і своеасаблівы сімвал аб'яднання народаў, якія жывуць на гэтай цудоўнай зямлі.
Пухавіцкі раён знаходзіцца ў паўднёва-ўсходняй частцы Мінскай вобласці і мяжуе з Мінскім, Слуцкім, Старадарожскім, Уздзенскім, Чэрвеньскім раёнамі Мінскай вобласці і Асіповіцкім раёнам Магілёўскай вобласці.
Пухавіцкі раён быў утвораны 17 ліпеня 1924 года. У 1996 годзе, 31 мая, паблізу вёскі Антонава Навасёлкаўскага сельсавета быў устаноўлены спецыяльны геадэзічны знак, які сведчыць аб тым, што Пухавіцкі раён з'яўляецца цэнтрам Рэспублікі Беларусь.
Пухавіцкі раён знаходзіцца ў паўднёва-ўсходняй частцы Мінскай вобласці і мяжуе з Мінскім, Слуцкім, Старадарожскім, Уздзенскім, Чэрвеньскім раёнамі Мінскай вобласці, а таксама Асіповіцкім раёнам Магілёўскай вобласці. Раён размешчаны ў межах Цэнтральнабярэзінскай раўніны. Рэльеф – плоскахвалісты.
Найбуйнейшыя рэкі, якія праходзяць па тэрыторыі Пухаўшчыны – Свіслач (з прытокамі Волма, Цітоўка, Талька) і Пціч (з прытокам Шаць). Ёсць два возера – Сяргеевіцкае і Мацярынскае. Створана вадасховішча Міхайлаўскае.
Плошча раёна складае 2,44 тыс.км2, з іх:
сельгасзямель – 105150 га,
у тым ліку раллі – 75521 га,
лясы займаюць – 107368 га.
На тэрыторыі раёна размешчана 311 населеных пунктаў, у тым ліку горад Мар'іна Горка, гарадскія пасёлкі Рудзенск, Свіслач, Праўдзінскі. Тэрыторыя раёна ўключае ў сябе 13 сельскіх саветаў і 1 пасялковы савет (Праўдзінскі). Сярод сельскіх населеных пунктаў найбольш буйнымі з'яўляюцца: пасёлак Дружны, аграгарадкі Пухавічы, Блонь, Дукора, Шацк, вёска Талька.
Насельніцтва на 1 студзеня 2016 года складала 65,7 тысячы чалавек (з іх гарадскога – 30,2 тыс. чал., сельскага – 35,4 тыс. чал. і горада Мар'іна Горка – 21,3 тыс. чал.).
У прамысловым комплексе раёна ажыццяўляюць дзейнасць звыш 90 арганізацый, у тым ліку 14 з іх з колькасцю працуючых ад 100 да 500 чалавек. Арганізацыі ажыццяўляюць знешнеэканамічную дзейнасць з 58 краінамі свету. Сельскагаспадарчай вытворчасцю займаецца 19 арганізацый.
Раён прывабны для замежных інвестараў, аб чым сведчыць дзейнасць больш як 20 арганізацый з замежнымі інвестыцыямі.
На тэрыторыі Пухавіцкага раёна развіта сацыяльная сфера, сфера гандлю і паслуг.
Усяго на тэрыторыі раёна зарэгістравана 1355 юрыдычных асобы, з іх: 757 суб'ектаў малога і сярэдняга прадпрымальніцтва, 53 – фермерскіх гаспадаркі, 171 – садоўніцкае таварыства, 33 ЖБК, 17 аграсядзіб, а таксама 58 устаноў адукацыі, 21 дом культуры, 1 сельскі клуб, 27 бібліятэк, 151 спартыўнае збудаванне, 40 медыцынскіх устаноў.
У Пухавіцкім раёне праводзіцца рэгіянальны фестываль песні і музыкі «Майскі вальс» на прыз кампазітара-земляка І.М.Лучанка, абласны фестываль народнай творчасці «Напеў зямлі маёй». Турыстаў з многіх краін свету прыцягвае сваёй самабытнасцю музейны комплекс старадаўніх народных рамёстваў і тэхналогій «Дудуткі». У 2015 годзе адкрыты новы турыстычны комплекс, сядзібна-паркавы комплекс «Дукорскi маёнтак».
У межах раёна знаходзяцца біялагічныя заказнікі рэспубліканскага значэння.
