Лёгкі сыпкі снег і ледзь адчувальны мароз. Надвор'е як быццам стаілася ў чаканні чагосці значнага.
Клятву на вернасць Радзіме ў элітнай частцы Узброеных Сіл Рэспублікі Беларусь па чарзе прамаўляюць новаспечаныя байцы, якія гатовы верай і праўдай, не шкадуючы сябе і ўласных сіл, служыць сваёй дзяржаве, народу і айчыне.
Маладыя, рослыя, дужыя... Цвёрда стаяць на нагах, упэўнена глядзяць наперад і моцна сціскаюць зброю. Той гонар, з якім салдаты прамаўляюць словы клятвы, выклікае спакой і дае зразумець нам, што ўсе мы знаходзімся пад надзейнай абаронай.
З сказанымі на дарогу словамі да маладых салдат звяртаецца начальнік штаба - першы намеснік камандуючага сіламі спецыяльных аперацый Узброеных Сіл палкоўнік Аляксандр Ільюкевіч. Затым хлопцаў віншуе старшыня Пухавіцкага райвыканкама Андрэй Атрушкевіч, нагадваючы ўсім пра важнасць воінскага абавязку.
Словы віншавання ў адрас навабранцаў таксама гучаць ад ветэрана 5-й асобнай брыгады генерал-маёра запасу Сяргея Дудко і настаяцеля храма Аляксандра Неўскага іерэя Рыгора Цалкова.
