Музейны комплекс наведалі дзеці і дарослыя з Дзмітрава
Больш за 30 гадоў горад Дзмітраў Расійскай Федэрацыі і Пухавіцкі раён з'яўляюцца пабрацімамі. Развіваючы партнёрскія адносіны, нашы дэлегацыі штогод наносяць адзін аднаму сяброўскія візіты.
Нядаўна гасцей з Дзмітраўскай гарадской акругі гасцінна сустракалі ў музейным комплексе старажытных народных рамёстваў і тэхналогій «Дудуткі». На гэты раз падарожнічаць па Беларусі адправіліся навучэнцы школ, чые бацькі з'яўляюцца ўдзельнікамі спецыяльнай ваеннай аперацыі, і прадстаўнікі адміністрацыі Дзмітраўскай гарадской акругі Маскоўскай вобласці.
Пабываўшы ў шляхецкай сядзібе XIX стагоддзя, хлопцы пазнаёміліся са светам старажытных рамёстваў. Экскурсія пачалася з наведвання рамесных майстэрняў, дзе госці змаглі не толькі ўбачыць гатовыя вырабы, але і паназіраць за працэсам іх стварэння. У майстэрні дрэваапрацоўкі, напрыклад, яны пачулі беларускі народны інструмент і нават паспрабавалі сыграць самастойна.
Уразіла расійскіх школьнікаў наведванне кузні, дзе ім прапанавалі паўдзельнічаць у майстар-класе і дапамагчы майстру выкаваць падкову з жалеза. Таксама ўдзельнікі экскурсіі пакаштавалі гарачы хлеб з печы і дамашні сыр у мясцовай пякарні.
— Мы вельмі рады вас вітаць у музейным комплексе «Дудуткі», які лічыцца адным з самых папулярных музеяў народнага побыту Беларусі, — звярнулася да дэлегацыі старшыня Пухавіцкага раённага Савета дэпутатаў Марыя Клімовіч.
Марыя Уладзіміраўна падзякавала гасцям за супрацоўніцтва і разам з кіраўніком спраў Пухавіцкага раённага выканаўчага камітэта Дзмітрыем Губарам уручыла кожнаму госцю памятныя сувеніры і фірмовую прадукцыю ААТ «Машхарчпрад».
У адказ прадстаўнікі дэлегацыі з Дмітрава перадалі падзячны ліст ад кіраўніка Дзмітраўскай гарадской акругі Маскоўскай вобласці Іллі Паначэўнага кіраўніцтву раёна за ўклад у ваенна-патрыятычнае выхаванне моладзі, падтрымку ўдзельнікаў СВА і іх сем'яў, умацаванне сяброўскіх сувязяў. Госці казалі аб тым, што рускі і беларускі народ звязаны шматвяковай гісторыяй, якую нельга падзяліць, і дадзены візіт — чарговы напамін пра гэта.
У маршруце нашых гасцей было нямала гістарычных мясцін, значных для беларускага народа. Перш, чым вярнуцца ў Дзмітраў, расіяне наведалі Мінск, пабывалі ў Міры і Нясвіжы.
Алеся СМІРНОВА.
