У ЦікТок з'явіўся чарговы ролік, звязаны з нашым раёнам. На гэты раз нейкі аматар «крытычных матэрыялаў» адлюстраваў два шматкватэрныя дамы ў аграгарадку Сяргеевічы з забітымі фанерай вокнамі і несімпатычнай прыдамавой тэрыторыяй. І падпісаў: «Аграгарадок Сяргеевічы. Пухавіцкі раён. Нашы дні». Стварыў, так бы мовіць, аблічча населенага пункта.
Хачу прызнацца: я не люблю крытыку ні пісаць, ні чытаць, ні глядзець. Яна аднабокая. Як у гэтым роліку: глядзіце, Сяргеевічы — гэта трушчобы! І ўсё. Ні табе спробы разабрацца ў праблеме, ні разнастайнасці поглядаў.
А рознабаковы погляд тут патрэбны. Сяргеевічы — аграгарадок вялікі (у ім амаль паўтары сотні домаўладанняў, 334 жыхары) і даволі вядомы не толькі ў нашым раёне, але і за яго межамі дзякуючы парк-гатэлю «Версаль»; і прыгожаму возеру, якое карыстаецца папулярнасцю ў аматараў актыўнага адпачынку. Не памылюся, калі скажу, што прыязджаючыя ў Сяргеевічы турысты ў першую чаргу бачаць дыхтоўныя хаты і дагледжаныя падворкі. Менавіта яны ствараюць агульную выяву населенага пункта, а не прыцягнуўшыя ўвагу цiктокера двухпавярхоўкі.
Але праблема ў наяўнасці, і варта зразумець, чаму гэтыя два шматкватэрныя дамы ў населеным пункце зараз такія, як ёсць. Будынкі, на якіх завастрылі ўвагу ў відэароліку, узведзены яшчэ ў савецкія часы па праектах, прымальных тады, але не папулярных зараз: у кватэрах пячное ацяпленне. Сур'ёзны рамонт ім патрэбен. Дарэчы, ААТ «Зазерка», да якога шэсць гадоў таму перайшлі Сяргеевічы, гэтыя дамы без увагі не пакінула: разабраліся з дакументамі, запрасілі спецыялістаў правесці экспертызу і атрымалі пацвярджэнне, што будынкі не аварыйныя. Летась за ўласныя сродкі сельгаспрадпрыемствы правялі рамонт даху, устанавілі новыя коміны, выцяжкі, дапамаглі жыхарам зрабіць рамонт у пад'ездах.
Варта падкрэсліць, што ўсе кватэры ў гэтых дамах — ведамасныя. Ніхто з жыхароў не паспяшаўся набыць іх ва ўласнасць. І гэта адна з прыкмет непапулярнасці такога жылля.
Пра незапатрабаванасць кватэр у двухпавярхоўках гавораць і прадстаўнікі прадпрыемства. У 18-кватэрным доме жыхары ёсць толькі ў шасці кватэрах: 11 чалавек. Адзін пад'езд цалкам зачынены: усе кватэры ў ім пустуюць. У 8-кватэрным доме пражывае ўсяго 17 чалавек. Ніхто не зарэгістраваны толькі ў адной кватэры.
У Сяргеевічах ёсць свабодныя індывідуальныя дамы, якія гаспадарка дае тым, хто прыязджае сюды працаваць. Ёсць і ўчасткі пад забудову. Лагічна, што ў сельскай мясцовасці жыллё ў шматкватэрных дамах не карыстаецца папулярнасцю, хаця новым спецыялістам яго таксама прапануюць. Такое жыллё сябе зжывае. Адсюль і большасць яго праблем.
А зараз аб людзях. З'явіліся пустуючыя кватэры — знайшліся і тыя, хто выбіў у іх вокны… У адных жыхароў вокны кватэр упрыгожаны фіранкамі, іншыя адгарадзіліся ад свету газетамі. Хтосці і рады бы быў давесці да ладу прыдамавую тэрыторыю, а камусцi дастаткова пакасіўшагася плоту. Каго больш, зразумела з агульнага аблічча дамоў.
Так, на праблемы трэба ўказваць. Але па прыватнасцях не варта рабіць агульных высноў. Трэба разумець, што калі на відэа Сілічы, то гэта не азначае, што Беларусь — горная краіна, а два праблемныя дамы — гэта не ўвесь населены пункт. Рэальнасць — яна заўсёды шырэйшая. І не заўсёды дэпрэсіўная, як паспрабаваў гэта паднесці аўтар відэароліка. У ёй шмат пазітыву. У гэтым лёгка можна пераканацца, пашукаўшы іншае відэа аб тых жа Сяргеевічах.
Наталля ПАРХОМЧЫК.
