Дыялогавая пляцоўка «Пераемнасць пакаленняў» у рамках рэспубліканскай акцыі «Клопат» прайшла на базе раённай цэнтральнай бібліятэкі. Яе арганізатарамі выступілі грамадскі арганізацыі: раённы Савет ветэранаў, раённае аб'яднанне прафсаюзаў, раённыя арганізацыі ЛДПБ і БРСМ, маладзёжны парламент пры раённым Савеце дэпутатаў.
За круглым сталом сустрэліся навучэнцы Мар'інагорскага аграрна-тэхнічнага каледжа, як прадстаўнікі моладзі, і ветэраны працы.
У кожнага з пакаленняў свае веды, свае ўяўленні аб свеце. Адназначна, моладзі ёсць чаму павучыцца ў ветэранаў. Але і людзям з вялікім жыццёвым вопытам карысна паглядзець на свет вачыма маладых. Вось пра гэта і ішла размова падчас дыялогавай пляцоўкі.
Так як сустрэча праходзіла напярэдадні Дня пажылога чалавека, прадстаўнікі грамадскіх аб'яднанняў падрыхтавалі сваім суразмоўцам залатога ўзросту падарункі. І ўсе ўдзельнікі дыялогавай пляцоўкі шчыра павіншавалі Віктара Вальдэмаравіча і Таісію Афанасьеўну Віярд з 60-годдзем сумеснага жыцця. Адным з падарункаў брыльянтавым юбілярам ад раённага аб'яднання прафсаюзаў стала падпіска на газету «Пухавіцкія навіны».