Мерапрыемства было арганізавана ў рамках святкавання Дня народнага адзінства камандай Wilder.by, аддзелам ідэалагічнай работы, культуры і па справах моладзі Пухавіцкага райвыканкама сумесна з раённым камітэтам БРСМ.
Па словах спецыяліста аддзела ідэалагічнай работы Наталлі Русаковіч, адзначаць святы людзі любяць па-рознаму, таму было прынята рашэнне, акрамя гулянняў у парку, для аматараў актыўнага адпачынку арганізаваць спартыўнае мерапрыемства.
У спаборніцтвах прынялі ўдзел адзінаццаць зборных каманд ад устаноў, арганізацый і прадпрыемстваў Пухаўшчыны. Агульная працягласць маршруту склала прыкладна 15 кіламетраў. Задача аказалася не з лёгкіх.
Першае месца заняла каманда Пухавіцкага РАНС. Хлопцы з вялікім адрывам ад астатніх пераадолелі маршрут, умела абыходзячы ўсе перашкоды, якіх было нямала: карчакі і паваленыя дрэвы, на якія раз-пораз садзіліся дном байдаркі.
Галоўным чынам яны былі сканцэнтраваны на Цітоўцы, і скончыліся толькі на месцы ўпадзення Цітоўкі ў Свіслач. Некаторым удзельнікам часам нават даводзілася пакідаць байдарку, каб абыйсці перашкоды.
Як адзначыў адзін з пераможцаў Кірыл Пыж, які разам са сваёй другой паловай Анастасіяй Макеевай прыйшоў самым першым, галоўную ролю тут адыгрывае фізічная сіла, цягавітасць і спрыт — якасці, якімі павінен валодаць кожны выратавальнік.
У канцы маршруту ўсіх удзельнікаў чакала гарачая вуха і салдацкая каша.
Затым прайшла цырымонія ўзнагароджання.
Станіслаў Белавусаў.