Дзень Незалежнасці - свята, якое адзначае практычна кожная краіна свету. У кожнага свята свая гісторыя. У нашай краіне гэта Дзень вызвалення Беларусі ад фашызму. Дата абрана самімі беларусамі падчас агульнанацыянальнага рэферэндуму. Таму, напэўна, гэта для нас двайное свята.
3 ліпеня мы ўсёй краінай успамінаем загінуўшых, але непакораных! Тысячы імёнаў!.. Тысячы чалавечых лёсаў, якімі бязлітасна распарадзілася Вялікая Айчынная вайна! Тысячы подзвігаў дзеля міру!
З удзячнасцю за магчымасць жыць, працаваць, гадаваць дзяцей па традыцыі кветкі да абеліска загінуўшым у Мар'інай Горцы ўсклалі кіраўніцтва Пухавіцкага раённага выканаўчага камітэта, раённага Савета дэпутатаў, ветэраны Вялікай Айчыннай вайны, кіраўнікі сілавых структур, духавенства, госці з Расіі, прадстаўнікі грамадскіх арганізацый, старшыні сельскіх выканаўчых камітэтаў, жыхары раёна. Хвілінай маўчання прысутныя ўшанавалі памяць герояў Вялікай Айчыннай вайны.
Да землякоў звярнуўся старшыня раённага выканаўчага камітэта Андрэй Атрушкевіч. Ён павіншаваў пухаўчан з Днём Незалежнасці краіны, заклікаў усіх быць заўсёды адзіным народам. У гэтым наша сіла і залог мірнай будучыні.
Па традыцыі ў Дзень Незалежнасці ў горадзе прайшло святочнае шэсце. У калонах - прадстаўнікі працоўных калектываў прадпрыемстваў, арганізацый, грамадскіх аб'яднанняў, навучэнцы.
Тэкст: Алена ШАНТЫКА.
Фота: Станіслаў Белавусаў.
