У Пухавіцкім раёне святкуюць Дзень Дзяржаўнага сцяга, Дзяржаўнага герба і Дзяржаўнага гімна Рэспублікі Беларусь.

Герб, сцяг, гімн - сімвалы свабоды нашай краіны і нацыянальнай ідэнтычнасці нашага народа. Іх мы сустракаем у кабінетах кіраўнікоў, бачым на дахах і фасадах будынкаў, чуем на мерапрыемствах рознага маштабу. Іх значнасць цяжка пераацаніць у пабудове нашай дзяржаўнасці. З гэтымі словамі, мабыць, пагодзяцца многія з тых, хто прыйшоў падзяліць радасць з нагоды свята ў гонар нашых сімвалаў нацыянальнай і дзяржаўнай свабоды.

Яркае сонца, аблокі і квітнеючыя каштаны - ідэальнае надвор'е для культурна-масавага адпачынку. Сёння ўсё спрыяла таму, каб усім разам сабрацца на цэнтральнай плошчы Пухавіцкага раённага цэнтра культуры і прыемна правесці час.

Старшыня Пухавіцкага райвыканкама Андрэй Атрушкевіч.

У сваім звароце да гасцей мерапрыемства Старшыня Пухавіцкага райвыканкама Андрэй Атрушкевіч адзначыў, што пад нашым сцягам ужо нарадзіліся і выраслі пакаленні людзей, якія непарыўна звязаны з гістарычнай памяццю, якія і сёння дазваляюць беларусам працягваць абраны шлях.

- Няхай гэта свята яшчэ мацней з'яднае, умацуе пачуццё абавязку і асабістай адказнасці за краіну і гатоўнасць старанна працаваць дзеля яе росквіту, — сказаў Андрэй Міхайлавіч.

Урачыстае ўзняцце сцяга пасля слоў старшыні змянілася «Плац-парадам» аркестра 5-й асобнай брыгады спецыяльнага прызначэння. Напэўна, ужо многім пухаўчанам цяжка ўявіць такія мерапрыемствы без нашых доблесных абаронцаў Айчыны, якія заўсёды выразна і зладжана выконваюць свае творчыя нумары.

Дзяржаўныя сімвалы пачалі перамяшчэнне з цэнтра плошчы, пасля пачаўся флэшмоб «Беларусь».

«Беларусь - гэта імя народа! Беларусь - гэта імя перамог! Беларусь - гэта крылы народа! Беларусь - гэта сонечнае святло!»

Пасля гэтых выдатных радкоў было абвешчана аб завяршэнні ўрачыстага мерапрыемства. З плошчы ўсе дружна адправіліся ў парк імя Любы Гайдучонак, дзе гасцей парку чакаюць квіз-гульні, квэсты, настольныя гульні, дзіцячыя атракцыёны, конкурсы, фотазоны, салодкая вата, кукуруза, квас і яшчэ шмат усяго таго, што трэба для добрага адпачынку. Тут кожны зможа знайсці сабе захапленне па гусце.

Ключавымі падзеямі мерапрыемства ў парку стала насычаная канцэртная праграма «Вясне дарогу» і маладзёжна-падлеткавая дыскатэка «Усё стала вакол блакітным і зялёным».

Станіслаў Белавусаў.