Пухаўчане адсвяткавалі 1 Мая!
Урачыстае мерапрыемства, прысвечанае Святу працы, прайшло на плошчы Пухавіцкага раённага цэнтра культуры.
Мерапрыемства адкрыла старшыня Пухавіцкага раённага аб'яднання прафсаюзаў Людміла Гулякевіч.
— 1 Мая — гэта свята, якое аб'ядноўвае ўсе пакаленні каштоўнасцямі мірнай і стваральнай працы, салідарнасці і справядлівасці, — казала Людміла Фёдараўна. — Такім чынам нам перадаецца разуменне і ўсведамленне таго, што толькі ўпартай працай можа быць створаны дабрабыт краіны і кожнага яе грамадзяніна. Гэта свята згуртавала шматмільённае войска працоўных па ўсім свеце. Першамайскае свята для працоўных і прафсаюзаў было і застаецца днём міжнароднай салідарнасці, бо галоўная задача прафсаюзаў гэта — сацыяльна-эканамічная абарона чалавека працы. У нашым раёне прафсаюзы прадстаўлены пятнаццаццю галінамі і двумастамі прафсаюзнымі арганізацыямі, у якіх працуюць больш за васемнаццаць тысяч членаў прафсаюзаў. А яшчэ нас усіх аб'ядноўвае наша зямля, наша краіна, наш любімы горад. Пухаўшчына заўсёды славілася таленавітымі працавітымі людзьмі, якія жывуць у добрасуседстве і дастатку, працуюць на карысць агульнай справы і сваімі рукамі робяць наш раён яшчэ больш прывабным і камфортным.
Падчас мерапрыемстваў за высокі прафесіяналізм, добрасумленную працу, актыўную працу, асабісты ўклад у развіццё і ўмацаванне прафсаюзнага руху былі ўзнагароджаны работнікі адукацыі і навукі, інфармацыі, спорту і турызму, аграпрамысловага комплексу, энергетычнай галіны, дзяржаўных і іншых устаноў. Паміж цырымоніямі ўзнагароджанняў для гасцей мерапрыемства выступалі спевакі і творчыя калектывы Пухаўшчыны, а на плошчы працавалі выставы, атракцыёны і аб'екты грамадскага харчавання.
Тэкст: Станіслаў Белаусаў.
Фота: Маша МІСКЕВІЧ, Станіслаў БЕЛАВУСАЎ.