Вясна, сонца і суботнік. Гэта пра 22 красавіка, калі ўся рэспубліка выйшла на ўборку і добраўпарадкаванне тэрыторый. Падтрымалі традыцыю і пухаўчане.
Маштабныя работы разгарнуліся ў аграгарадку Зазер'е. Тут высадзіўся сур'ёзны працоўны дэсант, у склад якога ўвайшлі работнікі райвыканкама, прадстаўнікі дэпутацкага корпуса, грамадскіх арганізацый, сельгаспрадпрыемстваў. Разам з пухаўчанамі працаваў дэпутат Палаты прадстаўнікоў Нацыянальнага сходу Рэспублікі Беларусь Алег Белаконеў.
Марыя Клімовіч, старшыня раённага Савета дэпутатаў:
У гэтым годзе раённае свята працаўнікоў сяла «Дажынкі – 2023» плануецца правесці ў аграгарадку Зазер'е. З гэтым і звязана рашэнне арганізаваць самую маштабную працоўную акцыю ў рамках суботніка менавіта тут: усе сілы накіраваны на добраўпарадкаванне гэтага прыгожага месца.
У аграгарадку прывялі ў парадак сквер, высеклі непатрэбную расліннасць уздоўж дарогі, разабралі старыя платы. З гэтых работ стартавала падрыхтоўка да раённых «Дажынак».
У Зазер'і пачаў свой працоўны дзень старшыня райвыканкама Андрэй Атрушкевіч. Затым ён разам са старшынёй канцэрна «Белнафтахім» Андрэем Рыбаковым прымаў удзел у пасадцы лесу, сустрэўся з міністрам адукацыі Рэспублікі Беларусь Андрэем Іванцом, які наведаў Рудзенску спецыяльную школу-інтэрнат.
У Рудзенску дзень пачаўся з мітынгу-рэквіема ля брацкай магілы грамадзян, якія загінулі ў гады Вялікай Айчыннай вайны. У мітынгу прынялі ўдзел намеснік міністра адукацыі Рэспублікі Беларусь Сяргей Руды і каманда валанцёраў з Рэспубліканскага валанцёрскага клуба «СЛОН» Беларускага дзяржаўнага ўніверсітэта культуры і мастацтваў. Потым на тэрыторыі спецыяльнай школы-інтэрната прайшла працоўная акцыя, да якой далучыўся Андрэй Іванец.
Актыўнымі ўдзельнікамі суботніка сталі работнікі адукацыі. Яны працавалі на добраўпарадкаванні ўстаноў адукацыі і населеных пунктаў. Вялікі дэсант высадзіўся ў аздараўленчым лагеры «Лясная казка»: вось-вось пачнецца аздараўленчы сезон, і навядзенне парадку тут — тэма актуальная.
Парадак навялі на тэрыторыях прамысловых і сельскагаспадарчых прадпрыемстваў, устаноў аховы здароўя і культуры, у месцах агульнага карыстання, ля помнікаў і воінскіх пахаванняў.
Святлана Ляшковіч, старшыня Дукорскага сельвыканкама:
Працаўнікі СПФ «Дрычын» наводзілі парадак на тэрыторыі былой школы ў вёсцы Карабовічы. Будынак дэмантавалі, і ўдзельнікі суботніка прыбіралі смецце, у тым ліку і тое, што пакінулі мясцовыя жыхары.
Дукорская школа працавала на добраўпарадкаванні воінскага пахавання ў вёсцы Пушча, Дрычынская — на добраўпарадкаванні помніка загінуўшым землякам у цэнтры аграгарадка Дрычын.
Работнікі ААТ «Энергія-Агра» займаліся добраўпарадкаваннем тэрыторый у вёсцы Белае.
Работнікі Дрычынскай і Дукорскай урачэбных амбулаторый падрыхтавалі да афарбоўкі агароджу сваіх тэрыторый. Мар'інагорская ЦРБ закупіла фарбу, і ў бліжэйшы час платы будуць пафарбаваны.
Працаўнікі Дрычынскага СДК фарбавалі фасад будынка, Дукорскага — бялілі дрэвы.
Вельмі дапамагло ў правядзенні работ па добраўпарадкаванні ТАА «Інфіда»: прадпрыемства прадаставіла тэхніку.
Праца знайшлася для ўсіх.
Наталля ПАРХОМЧЫК.
