14 красавіка ў адной з зал рэстарана «Спадчына» было шматлюдна. Тут прайшоў першы раённы інтэлектуальны квіз «Моладзь Пухаўшчыны», у якім прынялі ўдзел 18 каманд рабочай моладзі прадпрыемстваў раёна, газазабеспячэння, будаўніцтва, раённай бальніцы, устаноў адукацыі, банкаўскія работнікі. Арганізатарам выступіў аддзел ідэалагічнай работы, культуры і па справах моладзі Пухавіцкага раённага выканаўчага камітэта.
Удзельнікі адказвалі на пытанні рознага ўзроўню складанасці. Гульня складалася з сямі раундаў, прысвечаных гісторыі Беларусі і нашай роднай Пухаўшчыны: знакавым падзеям і мясцінам, жыццю знакамітых людзей, якія тут нарадзіліся, міфалогіі, прамысловасці і архітэктуры. У кожным блоку ўпор рабіўся не толькі на веды, але і на логіку. Прыемна назіраць, як маладыя людзі называюць правільныя адказы, дэманструюць сваю эрудыцыю, зладжанасць каманднай працы і імкненне да перамогі.
У выніку ўсіх раундаў ва ўрачыстай абстаноўцы вызначылі пераможцаў і прызёраў. Цырымонію ўзнагароджання правяла галоўны спецыяліст аддзела ідэалагічнай работы, культуры і па справах моладзі Пухавіцкага раённага выканаўчага камітэта Наталля Русаковіч. На першае месца выйшла каманда «Хітрыя лісы» сярэдняй школы №1 пасёлка Дружны, другое месца заняла каманда «Беларусачкі» сярэдняй школы №1 горада Мар'іна Горка, трэцім месцам журы ўзнагародзілі каманду «Міра» ААТ «Машхарчпраду». Усім камандам-удзельнікам уручылі дыпломы за ўдзел, а пераможцам — кубкі і памятныя сувенiры ад спонсараў.
Віктар СМІРНОЎ, удзельнік каманды «Гуманісты»:
— Інтэлектуальны квіз — выдатная магчымасць праверыць сваю эрудыцыю, асвяжыць веды ў пытаннях краязнаўства. Мерапрыемства прайшло на высокім узроўні, адчувалася здаровая канкурэнцыя.
Павел ШАЙТАНАЎ, удзельнік каманды «Апорныя веды»:
— Мерапрыемства выдалася сапраўды цікавым і масавым. Пытанні былі вельмі разнастайнымі. Для сябе я даведаўся шмат новых славутасцяў у Беларусі і яшчэ раз упэўніўся, што наша краіна вельмі багатая знакамітымі людзьмі, сваёй гісторыяй, культурай і традыцыямі. Таксама мне вельмі спадабалася, што для ўдзельнікаў арганізавалі салодкі стол падчас перапынку. Гэта выдатная магчымасць паразмаўляць з моладдзю з іншых арганізацый. Хацелася б, каб такія мерапрыемствы праводзіліся нашмат часцей.
Алеся СМІРНОВА.