22 сакавіка па ўсёй Беларусі праходзяць памятныя мерапрыемствы. Да брацкіх магіл, манументаў ускладаюць кветкі, успамінаючы пра тое, якія бязмерныя выпрабаванні выпалі на долю беларускага народа.
Ва ўрачыстым мітынгу ў вёсцы Прыстань ля помніка ахвярам фашысцкіх акупантаў прынялі ўдзел старшыня раённага Савета дэпутатаў Марыя Клімовіч, пракурор Пухавіцкага раёна Дзмітрый Лугін, ваенны камісар Пухавіцкага раёна Кірыл Бараноўскі, палкоўнік у адстаўцы Уладзімір Тамело, прадстаўнікі вайсковай часці 89417. Таксама на мерапрыемстве прысутнічалі ветэраны, школьнікі і мясцовыя жыхары.
Месца сустрэчы выбрана не выпадкова. Прыстань лічыцца вогненнай сястрой Хатыні. У гады акупацыі фашысты знішчалі вёску двойчы: у першы раз карным атрадам было расстраляна 128 чалавек (загінулі практычна ўсе мужчыны), другі раз – 133 чалавекі (у асноўным жанчыны і дзеці).
Удзельнікі мерапрыемства ўсклалі кветкі да мемарыяла і ўшанавалі памяць загінуўшых хвілінай маўчання.
Алеся Смірнова.