Мерапрыемства традыцыйна пачалося з выставы ў холе ДУК «Пухавіцкі РЦК», дзе госці мелі магчымасць азнаёміцца з разнастайнасцю прадукцыі брэндаў і прадпрыемстваў з розных вытворчых галін нашага раёна, дасягненнямі ўстаноў і грамадскіх арганізацый, атрымаць асалоду ад творчасці рамеснікаў, мастакоў і музыкантаў Пухаўшчыны.

Урачыстая частка мерапрыемства пачалася з паказу дакументальнага фільма пра Пухавіцкі раён. Цырымонію ўзнагароджання працаўнікоў урачыстай прамовай адкрыў старшыня Пухавіцкага раённага выканаўчага камітэта Андрэй Атрушкевіч.

- Мы - людзі розных прафесій і рознага жыццёвага вопыту, — сказаў Андрэй Міхайлавіч. - Але ўсіх нас аб'ядноўвае любоў да сваёй справы, прафесіяналізм і пачуццё адказнасці за вынікі сваёй працы. Мінулы год быў няпростым, але плённым. Усе намаганні працаўнікоў раёна былі накіраваны на забеспячэнне ўстойлівай работы эканомікі, дзякуючы чаму нам удалося нарасціць экспартныя пастаўкі, і сёння большасць нашых прамысловых прадпрыемстваў працуюць у штатным рэжыме. Асаблівую падзяку я хачу выказаць усім працоўным калектывам і, у прыватнасці, работнікам аграпрамысловага комплексу нашага раёна. Мінулы год стаў сапраўдным выпрабаваннем для працаўнікоў сельскай гаспадаркі: ім давялося змагацца літаральна за кожны rолас. І ў выніку чаго нашы аграрыі сабралі 109 тысяч тон збожжа. Дзякуючы вам, паважаныя работнікі сельскай гаспадаркі, на сталах пухаўчан заўсёды ёсць хлеб, мяса, малако, — адзначыў Андрэй Атрушкевіч.

Таксама словы віншаванняў у адрас лепшых работнікаў прагучалі ад намесніка старшыні Мінскага абласнога выканаўчага камітэта Аляксандра Кручанава, дэпутата Палаты прадстаўнікоў Нацыянальнага сходу Рэспублікі Беларусь Алега Белаконева, старшыні Мінскага абласнога аб'яднання прафсаюзаў Віктара Маліноўскага, Фёдара Каралені і Вікенція Завадскага, якія ў розны час працавалі кіраўнікамі Пухавіцкага раёна, і ад прадстаўнікоў дэлегацый з Дзяржынскага, Асіповіцкага, Чэрвеньскага і Уздзенскага раёнаў.

Алеся Смірнова.

Станіслаў Белавусаў.