У раённым аддзеле ўнутраных спраў навучэнцы старэйшых класаў пазнаёміліся з асаблівасцямі службы ў гэтых органах.
Міжведамасная прафілактычная акцыя «Cябруем з законам» праводзіцца ў гэтыя дні. У яе рамках у Пухавіцкім раённым аддзеле ўнутраных спраў прайшоў Дзень адчыненых дзвярэй для навучэнцаў выпускных класаў устаноў адукацыі горада Мар'іна Горка. Асноўная мэта якога - прафесійная арыентацыя.
Начальнік інспекцыі па справах непаўналетніх Пухавіцкага РАУС Надзея Вайніцкая і старшы інспектар групы кадраў Іван Чаркас распавялі старшакласнікам пра перавагі службы ў органах унутраных спраў, пра магчымасць паступлення ў ведамасныя ВНУ. Хлопцы з цікавасцю глядзелі фільм пра спецыфіку службы, прадэманстраваны ім падчас сустрэчы, пазнаёміліся з працай аператыўна-дзяжурнай часткi і матэрыяльным абсталяваннем РАУС.
Супрацоўнікі органаў унутраных спраў нагадалі дзецям аб захаванні дзеючага заканадаўства і мерах асабістай бяспекі. Некаторыя навучэнцы выказалі жаданне ў будучыні паспрабаваць сябе ў гэтай прафесіі.
Анастасія Плятнёва.
