ФК «Вікторыя» шукае спонсараў
Для футбольнай каманды ФК «Вікторыя» 2022 год аказаўся не проста паспяховым — ён стаў прарыўным: каманда гуляла ў другой лізе чэмпіянату Беларусі і заняла 4-е месца, што дало ёй магчымасць узняцца на прыступку вышэй. Для нашых спартсменаў гульня ў першай лізе — гэта новая магчымасць заявіць аб сабе, а яшчэ прадэманстраваць, што спорт у раёне знаходзіцца на высокім узроўні. Аднак магчымасці, якія адкрыліся, пацягнулі за сабой новыя праблемы. Гульня ў першай лізе патрабуе даволі вялікіх фінансавых затрат. Грошай, якія неабходны, у каманды няма. У сапраўдны момант каманду падтрымлівае ЗАТ «Дзіўныя тэхналогіі». Але гэтага нядосыць. ФК «Вікторыя» шукае спонсараў. З просьбай пасадзейнічаць у гэтай справе ігракі футбольнага клуба звярнуліся да старшыні райвыканкама.
Вайна за зямлю
Напэўна, «вайна» — гэта гучна сказана. Але зацяжны канфлікт грунтоўна пасварыў суседзяў.
Адна вуліца, два падворкі, паміж якімі існаваў гаспадарчы праезд. Прычым з таго моманту, як дамы на вуліцы пабудавалі: а гэта ўжо некалькі дзясяткаў гадоў. А тут гаспадары аднаго з домаўладанняў напісалі заяву аб прыватызацыі гаспадарчага праезду. Па законе падстава для гэтага ў іх ёсць. А вось па сумленні… Праездам некалькі дзесяцігоддзяў карысталіся дзве сям'і, і ніякіх праблем не ўзнікала. Таму суседзі не пагадзіліся. І вось ужо некалькі гадоў ідзе цяжба: камісіі, суды…
Такая гісторыя зараз адбываецца ў вёсцы Вецярэвічы. Дапамагчы ў вырашэнні пытання са спрэчным участкам зямлі старшыню райвыканкама папрасіла грамадзянка, не згодная з прыватызацыяй гаспадарчага праезду. Праблема будзе дасканала вывучана.
Дарожнае пытанне
Жыхар вёскі Ясноўка паскардзіўся на тое, што камунальныя службы не чысцяць ад снегу дарогу да яго дома, які размешчаны крыху ў баку ад асноўнай вясковай вуліцы. Здзіўленне ў грамадзяніна выклікае і праца службы 115, дыспетчар якой на заяўку, пададзеную 12 снежня, дала адказ, што працы будуць выкананы 4 студзеня. Андрэй Атрушкевіч даручыў УП «Жылцепласэрвіс» КХ дарогу, пра якую ішла размова, чысціць разам з асноўнай магістраллю, а старшыні Голацкага сельсавета ўзяць выкананне работ пад свой кантроль.
Святло, але спрэчнае
Пытанне вулічнага асвятлення ў вёсцы Дайнова Навасёлкаўскага сельсавета, аграгарадку Амельна і вёсцы Сінча Дуброўскага сельсавета ўзняў жыхар горада Мар'іна Горка. Напрыклад, ён паскардзіўся на тое, што ў вёсцы Дайнова на адной з вуліц гараць толькі тры ліхтары. Старшыня райвыканкама даў даручэнне спецыялістам Пухавіцкага РЭС разабрацца з праблемай у найкарацейшыя тэрміны.
Варта нагадаць, што святлакропкі ў кожным населеным пункце размяшчаюцца па пэўнай схеме. Пра гэта мы пісалі ў № 93 газеты «Пухавіцкія навіны» ад 3 снежня 2022 года.
Наталля ПАРХОМЧЫК.
