Сёння ў Мар'інай Горцы прайшлі мерапрыемствы ў рамках дабрачыннай акцыі «Адзіная Міншчына — сэрца Беларусі».
Удзельнікаў акцыі, якія прыехалі з Мінска, на мяжы з Пухавіцкім раёнам сустрэлі прадстаўнікі Пухавіцкага райвыканкама і раённага аб'яднання прафсаюзаў.
Яны правялі караван машын з беларускімі сцягамі да дома прыёмнай сям'і Яткоўскіх.
На ганку гасцей віталі Ала Міхайлаўна і Вадзім Васільевіч у асяроддзі дзяцей. У гэтай сям'і 12 дзяцей, сямёра з якіх прыёмныя. Праўда, трое з іх ужо стварылі свае сем'і.
Госці, апранутыя ў касцюмы казачных персанажаў, адразу стварылі яркую атмасферу свята добрымі пажаданнямі, песнямі і танцамі.
Падарункі сям'і ўручылі старшыня Пухавіцкага раённага аб'яднання прафсаюзаў Людміла Гулякевіч, старшыня Мінскай абласной арганізацыі Беларускага прафсаюза работнікаў дзяржаўных і іншых устаноў Уладзімір Філімонаў, намеснік генеральнага дырэктара ААТ «Слуцкі сыраробны камбінат» Віктар Ражанец.
Творчая сям'я Яткоўскіх аддзячыла за віншаванні, выканаўшы шэраг навагодніх песень.
Акцыя «Адзіная Міншчына - сэрца Беларусі» праходзіць з 20 па 23 снежня ў рамках якой прадстаўнікі арганізацый, прафсаюзаў і грамадскіх аб'яднанняў наведваюць дзіцячыя дамы і інтэрнаты, размешчаныя ў розных раёнах Мінскай вобласці.
Андрэй Мазанік.