У сярэдняй школе №2 горада Мар'іна Горка на базе 6 «А» класа створаны ваенна-патрыятычны клас, класным кіраўніком якога з'яўляецца выкладчык беларускай мовы і літаратуры Святлана Аляксееўна Чарвякова.
На мінулым тыдні ў Музеі гісторыі і баявой славы вайсковай часці 89417 адбылося ўрачыстае прысвячэнне 22 шасцікласнікаў у навучэнцы ваенна-патрыятычнага класа. Дзеці прамовілі ўрачыстую клятву з абяцаннем горача любіць сваю Радзіму, свой народ, быць адданымі сваёй Айчыне, імкнуцца стаць дастойнымі грамадзянамі Рэспублікі Беларусь. Для кожнага з іх гэты дзень застанецца ў памяці як адзін з самых сур'ёзных і адказных крокаў у жыцці.
Юных патрыётаў павіншавалі і пажадалі ім быць смелымі і мэтанакіраванымі намеснік камандзіра па ідэалагічнай рабоце вайсковай часці 89417 падпалкоўнік Андрэй Шарупіч і намеснік дырэктара сярэдняй школы №2 горада Мар'іна Горка Наталля Жабко.
У сваім звароце Андрэй Сяргеевіч адзначыў асаблівы сімвалізм прысвячэння шасцікласнікаў менавіта ў Музеі гісторыі і баявой славы, дзе ўвекавечаны імёны 105 воінаў, якія аддалі свае жыцці, выконваючы інтэрнацыянальны абавязак у Рэспубліцы Афганістан. Усе яны былі сапраўднымі патрыётамі і героямі. Памяць аб іх абуджае ў хлопцах сапраўдны патрыятызм.
Навучэнцы, бацькі і іх госці ўшанавалі памяць герояў-разведчыкаў і ўсклалі кветкі да мемарыяла воінам 334-га асобнага атрада спецыяльнага прызначэння.
Алеся СМІРНОВА.
