Рыбакам неабходна выконваць правілы паводзін на вадзе.
Зусім хутка ўдараць першыя маразы, якія скуюць вадаёмы лёдам. Актывізуюцца аматары зімовай рыбалкі. І трэба памятаць, што гэта хобі рыбакам можа прынесці не толькі добрыя эмоцыі, але і небяспеку.
Круглы год аматары рыбалкі не прапускаюць магчымасць атрымаць асалоду ад любімага занятку на прыродзе, паспаборнічаць з суседам, злавіўшы рыбы больш, чым у яго. Рыбакоў можна сустрэць не толькі на берагах рэк ці вадаёмаў. Многія рыбачаць з моста або лодкі. Але ці заўсёды грамадзяне памятаюць і прытрымліваюцца правілаў бяспекі?
Напярэдадні зімовага перыяду супрацоўнікі раённай арганізацыі АСВОД праводзяць прафілактычную акцыю «Бяспечная лоўля рыбы». Старшыня раённай арганізацыі Святлана Рыжова, актыўныя члены таварыства ратавання на водах правялі рэйд, накіраваны на папярэджанне няшчасных выпадкаў сярод аматараў рыбалкі.
Члены раённай арганізацыі выдалі рыбаловам-аматарам прафілактычныя брашуры і ўлёткі, засяродзілі ўвагу на правілах паводзін ля вады.
— Нажаль, трагедыі на вадзе не рэдкасць і ў сезон, калі людзі перастаюць купацца на азёрах і рэках, — адзначае Святлана Рыжова. — Яны адбываюцца з-за бестурботнасці і банальнага няведання нескладаных правіл паводзін каля вады. Вядома, большасць нашых грамадзян асцярожныя, але ёсць і такія, хто рызыкуе ўласным здароўем і жыццём. Неабходна памятаць і выконваць простыя правілы бяспекі.
Збіраючыся на рыбалку, трэба пакінуць каардынаты родным: падрабязна расказаць, куды вы пайшлі, з кім, не забыцца сотавы тэлефон. На змерзлыя вадаёмы трэба выходзіць з каламі, вяроўкай (ад 10 метраў), з мяшочкам, напоўненым пяском, і ў выратавальнай камізэльцы, бо камізэлька — найважнейшая рэч: яна не дасць сысці пад лёд.
Анастасія ПЛЯТНЁВА.
