Штогод 7 лістапада ў Беларусі адзначаецца агульнарэспубліканскае свята — Дзень Кастрычніцкай рэвалюцыі 1917 года. У Пухавіцкім раёне ўрачыстае мерапрыемства да 7 лістапада прайшло ў ДУК «Пухавіцкі РЦК». Адкрыла імпрэзу старшыня Пухавіцкага раённага аб'яднання прафсаюзаў Людміла Гулякевіч.
— 7 лістапада мы адзначаем дзень Кастрычніцкай рэвалюцыі, якая адкрыла дарогу ўсяму чалавецтву да зацвярджэння грамадства сацыяльнай справядлівасці, роўнасці і павагі да чалавека працы, — сказала Людміла Фёдараўна. — 105 гадоў таму працоўныя Расійскай Імперыі на ўвесь свет заявілі аб сваім праве жыць і працаваць па сваім разуменні. без цароў і гаспадароў. Значнасць ідэалаў Вялікага Кастрычніка пераканаўча пацвярджае гісторыя. Перамога сацыялістычнай рэвалюцыі спыніла непадзельнае панаванне капіталу ў міжнародным маштабе, адкрыла эпоху пераходу чалавецтва ад капіталізму да сацыялізму, пазначыла новы шлях сацыяльнага прагрэсу, у аснову якога было пакладзена сапраўднае народаўладдзе. Дзякуючы Кастрычніцкай рэвалюцыі былі створаны ўмовы для рэалізацыі на практыцы асноўных правоў чалавека, якія ўпершыню атрымалі рабочыя і сяляне: права на працу і на адпачынак, права на жыллё, адукацыю, сацыяльнае забеспячэнне ў старасці, ахову здароўя, выбарчае права і іншыя. Пад уздзеяннем ідэй Кастрычніцкай рэвалюцыі шырылася барацьба за мір, мацнела інтэрнацыянальная салідарнасць. Перамога Кастрычніка выклікала ў мільёнаў людзей небывалы энтузіязм, патрыятызм і гарачае імкненне будаваць справядлівую, свабодную і квітнеючую сацыяльную дзяржаву.
Станіслаў БЕЛАВУСАЎ.