У перыяд з 30 кастрычніка па 7 лістапада арганізавана аздараўленне вучняў у аздараўленчых лагерах з дзённым знаходжаннем на базе ўстаноў агульнай сярэдняй адукацыі.
— За гэтыя дні ў нашым раёне плануецца аздаравіць 400 дзяцей, — расказвае Анжэла Васілега, вядучы спецыяліст Прадстаўніцтва Мінскага абласнога ўпраўлення Рэспубліканскага цэнтра па аздараўленні і санаторна-курортным лячэнні насельніцтва па Пухавіцкім раёне. — У горадзе будзе арганізавана 5 лагераў з дзённым знаходжаннем пры ўстановах адукацыі, а ў сельскай мясцовасці — 10 лагераў. Памер сродкаў на патанненне кошту пуцёвак у аздараўленчыя лагеры з дзённым знаходжаннем на адзін койка-дзень на кожнае дзіця складае 4 рублі 55 капеек.
У план выхаваўчай работы аздараўленчых лагераў уключаны культурныя і спартыўна-аздараўленчыя мерапрыемствы, якія будуць накіраваны на патрыятычнае, маральнае выхаванне, фарміраванне навыкаў здаровага ладу жыцця. Арганізаваць праграму адпачынку дапамогуць работнікі цэнтраў творчасці дзяцей і моладзі «Світанак» і «Вясёлка», ФАЦ «Вікторыя», Пухавіцкай СДЮШАР.
Алена ІВАНОВА.
