Рэспубліканская прафсаюзная акцыя «Павіншуем маму разам!», прымеркаваная да Дня маці, праводзіцца ў Беларусі з 10 па 16 кастрычніка. У ёй актыўна прымаюць удзел прадпрыемствы і арганізацыі Пухавіцкага раёна.
У рамках акцыі першасныя прафсаюзныя арганізацыі на месцах прапануюць работнікам выбраць віншавальную паштоўку, падпісаць яе, укласці ў канверт і бясплатна адправіць сваёй маці.
– Гэта светлае свята – выдатная нагода яшчэ раз сказаць усім мамам самыя далікатныя словы, падзякаваць за любоў і падтрымку, цярпенне і дабрыню. Бо часам нам зусім не хапае часу на віншаванні блізкіх і родных людзей, – патлумачыла сутнасць акцыі старшыня першаснай прафсаюзнай арганізацыі КСУП «Зазерка» Ленкавец Людміла Васільеўна.
Па яе словах, работнікі гаспадаркі з задавальненнем прынялі ўдзел у акцыі. Звыш 100 маляўнічых паштовак было адпраўлена напярэдадні свята самым дарагім і каханым са шчырымі пажаданнямі, ласкавымі і кранальнымі словамі павагі і падзякі.
Людміла ГУЛЯКЕВІЧ.