У рамках адзінага дня інфармавання ў філіяле КУП «Мінскаблдарбуд»-ДРБУ-169 адбылася размова на актуальныя тэмы, якія тычацца тэматыкі святкавання Дня народнага адзінства, бяспекі руху і правільнай утылізацыі камунальных адходаў.
Перад работнікамі дарожнага прадпрыемства выступілі начальнік аддзела ідэалогіі Пухавіцкага райвыканкама Алена Адамейка, начальнік Пухавіцкага РАУС Уладзімір Смірноў і начальнік раённай інспекцыі прыродных рэсурсаў і аховы навакольнага асяроддзя Наталля Калясенка.
Уладзімір Смірноў прывёў статыстыку па дарожна-транспартных здарэннях, якая другі год у раёне застаецца прыкладна аднолькавай, што кажа аб тым, што і пасажыры, і кіроўцы не робяць належных высноў і па-ранейшаму дастаткова безадказна ставяцца да выканання правілаў дарожнага руху. Вынік заўсёды сумны: за 8 месяцаў бягучага года ў раёне адбылося 20 ДТЗ, у якіх 3 чалавекі загінулі, а 22 пацярпела. За час правядзення пастаянных прафілактычных акцый было выяўлена 4,5 тысячы правапарушэнняў. 751 з іх здзейснілі пешаходы, якія часта і становяцца віноўнiкамі многіх аварыйных сітуацый.
— Памятаеце аб каштоўнасці свайго і чужога жыцця. Не спяшайцеся, цвяроза ацэньвайце дарожную сітуацыю, заўсёды пакідайце час на рэагаванне, - заклікаў прысутных начальнік РАУС.
Наталля Калясенка распавяла пра тое, як актуальна сёння праблема правільнай утылізацыі адходаў і паасобнага збору смецця. Гэта выклікана не толькі тым, што па параўнанні з тым, як гэта было 15 гадоў таму, значна павялічылася колькасць утылізуемага смецця (на аднаго беларуса ў год прыходзіцца каля 350 кг), але і з тым, як змяніўся склад гэтага смецця. Ён стаў значна больш небяспечным. Для прыкладу: адна батарэйка забруджвае да 400 літраў вады і да 20 квадратных метраў зямлі. Менавіта па гэтай прычыне вельмі важна сартаваць смецце, а ВМР здаваць на перапрацоўку. У нашым раёне аказвае дапамогу ў зборы смецця ГП «Экадругснаб».
Прысутным прадэманстравалі відэаролікі па дадзенай тэматыцы. Прагляд выклікаў у прысутных пытанні, якія тычыліся ўстаноўкі кантэйнераў, здачы пэўных відаў адходаў і неабходнасці выхавання правільных экалагічных паводзін у насельніцтва.
Алена ШАНТЫКА.
