Прафсаюзныя лідэры праводзяць маніторынг кошту і наяўнасці прадуктаў у магазінах.
У Мар'інай Горцы маніторынг цэн нядаўна праводзіўся ў крамах «ТрыА» ТП ТАА «Пухавічыгандаль» і «Капеечка» ЗАТ «Дабраном» па вуліцы Ленінскай. Штомесяц ён праводзіцца па 89 пазіцыях. І па 26 пазіцыях - кожны тыдзень. Старшыня раённага аб'яднання прафсаюзаў Людміла Гулякевіч аналізуе наяўнасць, асартымент і запасы тавараў.
Як адзначыла Людміла Фёдараўна, значнага павышэння коштаў за апошнія тры месяцы не назіраецца. А вось на сезонную прадукцыю - гародніна і садавіна - відаць зніжэнне коштаў. Напрыклад, у краме «Капеечка» капуста зараз каштуе 47-48 капеек, а ў чэрвені была па цане 1 рубель 22 капейкі. Морква каштавала 1 рубель 53 капейкі, а зараз - 47 капеек. Пакуль толькі цана на яблыкі застаецца на ранейшым узроўні.
Многія памятаюць ажыятаж з мукой, калі вельмі моцна вырас попыт. Пакупнікі бралі муку празапас, таму на прылаўках крамы выбар быў невялікі. Але варта адзначыць, што росту коштаў, якога ўсе баяліся, не адбылося.
У перыяд летніх нарыхтовак адзначаўся і попыт на цукар. Але і на гэты прадукт цэны пасля павышэння ўжо не мяняліся (апошні раз цукар даражэў у сярэдзіне красавіка).
- Вынікі праведзеных маніторынгаў накіроўваюцца ў Федэрацыю прафсаюзаў Беларусі, дзе іх абагульняюць і накіроўваюць у МАРГ для выпрацоўкі прапаноў па недапушчэнні неабгрунтаванага завышэння коштаў, - адзначае Людміла Гулякевіч.
Анастасія Iюльская.