У мінулую суботу адбыўся «Піянер-fest «Разам з БРПО» у ДУДА «Цэнтр творчасці дзяцей і моладзі «Світанак», паведаміла старшыня раённай піянерскай арганізацыі Алена Копцава.
На свяце прысутнічалі больш за 100 піянераў, акцябрат і важатых усяго раёна. Мерапрыемства было прысвечана Дню нараджэння Беларускай рэспубліканскай піянерскай арганізацыі.
Спецыяліст аддзела ідэалагічнай работы, культуры і па справах моладзі Пухавіцкага раённага выканаўчага камітэта Наталля Русаковіч пажадала быць актыўнымі і ініцыятыўнымі, імкнуцца да добрых спраў на карысць Радзімы. Навучэнцы Цэнтра ў ходзе свайго выступлення прадставілі сучасную піянерскую арганізацыю, дзейнасць якой поўная яркіх знамянальных падзей. Граматамі раённага Савета Грамадскага аб'яднання «Беларуская рэспубліканская піянерская арганізацыя» за актыўны ўдзел у рэалізацыі праектаў і праграм БРПА былі ўзнагароджаны піянеры-лідэры і акцябраты.
У гэты ўрачысты дзень шэрагі піянераў папоўнілі яшчэ 11 актыўных і таленавітых хлопчыкаў і дзяўчынак. Ва ўрачыстай абстаноўцы яны дружна і шчыра паабяцалі любіць сваю Радзіму, быць добрымі, сумленнымі і справядлівымі. Ім трэба будзе выконваць ганаровую місію – праслаўляць сваю краіну, развіваць патэнцыял роднага краю.
У рамках мерапрыемства працавала творчая пляцоўка «Горад майстроў» з цікавымі майстар-класамі. Свае музычныя падарункі дарылі навучэнцы Цэнтра і ДУА «Сярэдняя школа №4 г. Мар'іна Горка». Піянерскае свята стала яркім завяршэннем Тыдня дадатковай адукацыі.
