«Захоўваем мінулае, цэнім сучаснасць, будуем будучыню», — такой стала тэма традыцыйнай жнівеньскай педагагічнай канферэнцыі, якая прайшла ў Мар'інай Горцы.
На свой «першы званок» педагогі сабраліся ў раённым Цэнтры культуры. Мерапрыемства адкрывала выстава, на якой установы адукацыі прадставілі самыя цікавыя свае праекты. У фае РЦК прайшоў паказ мадэляў школьнай формы, былі арганізаваны фотазоны.
З пачаткам новага навучальнага года работнікаў устаноў адукацыі павіншавалі старшыня раённага выканаўчага камітэта Андрэй Атрушкевіч, старшыня раённай арганізацыі Беларускага прафсаюза работнікаў адукацыі і навукі Таццяна Швель, начальнік упраўлення па адукацыі, спорце і турызме Ганна Скорая.
Падчас канферэнцыі была прааналізавана праца за мінулы навучальны год і пастаўлены задачы на будучы. Лепшыя работнікі сістэмы адукацыі атрымалі ўзнагароды - граматы і падзякі Міністэрства адукацыі Рэспублікі Беларусь, Мінскага абласнога і Пухавіцкага раённага выканаўчых камітэтаў, галіновага прафсаюза. Па традыцыі, удзельнікі канферэнцыі ўшаноўвалі маладых спецыялістаў.
А ў завяршэнні на сцэну выйшлі юныя артысты. Іх музычныя нумары сталі падарункам педагогам да новага навучальнага года.
Наталля Пархомчык.