Усяго пару дзён канікул засталося ў школьнікаў. Лета ззаду. Гэта крыху сумна, але ў многіх хлопцаў, упэўнена, застануцца самыя добрыя ўражанні аб летніх месяцах. І шмат у чым гэта дзякуючы таму, што школьнікі правялі іх у дзіцячых аздараўленчых лагерах, дзе было шмат усяго цікавага: зносіны, паездкі, экскурсіі, конкурсы, спаборніцтвы і іншыя забаўляльныя мерапрыемствы.
— У Пухавіцкім раёне на працягу летняй аздараўленчай кампаніі працавала 48 аздараўленчых лагераў, у якіх адпачылі 2782 дзіцяці, — расказвае спецыяліст па аздараўленні Прадстаўніцтва Мінскага абласнога ўпраўлення Рэспубліканскага цэнтра па аздараўленні і санаторна-курортным лячэнні насельніцтва Анжэла Васілега. — Працаваў стацыянарны аздараўленчы лагер, школьныя пляцоўкі з дзённым знаходжаннем, спартыўна-аздараўленчыя лагеры і школьныя лагеры з кругласутачным знаходжаннем.
Таксама на працягу летняга перыяду працавала 3 лагеры працы і адпачынку: гэта лагер «Крута» з дзённым знаходжаннем на базе ДУА «Рудзенская сярэдняя школа», а таксама два лагеры з кругласутачным знаходжаннем на базе ДУА «Голацкі КПК дзіцячы сад-сярэдняя школа», дзе была арганізавана работа ў рэспубліканскім сельскагаспадарчым даччыным унітарным прадпрыемстве «Зазерье».
Пры камплектаванні лагераў прыярытэт аддаваўся дзецям-сіротам, дзецям-інвалідам, дзецям са шматдзетных і малазабяспечаных сем'яў. Усяго аздароўлена 1254 дзіцяці гэтай катэгорыі.
Падчас чацвёртай змены было арганізавана аздараўленне дзяцей-сірот з ДУА «Рудзенская дапаможная школа-інтэрнат» у стацыянарным аздараўленчым лагеры «Лясная казка».
— У гэтым годзе дзеці з інтэрната адпачывалі сумесна з дзецьмі з агульнаадукацыйных школ раёна, — расказвае галоўны спецыяліст упраўлення па адукацыі, спорце і турызме райвыканкама Дарына Дароўская. — Гэта станоўча паўплывала на працэс сацыялізацыі падлеткаў, адаптацыі іх у новым асяроддзі, на выхаванне навыкаў зносін, талерантнасці, сумесную творчую дзейнасць.
У летнюю аздараўленчую кампанію 2022 года аздаравілася і 27 падлеткаў, якія знаходзяцца на ўліку ў інспекцыі па справах непаўналетніх. Гэтыя хлопцы, як і дзеці з сем'яў, якія знаходзяцца ў сацыяльна небяспечным становішчы, удзельнічалі ў ваенна-патрыятычных мерапрыемствах з наведваннямі і экскурсіямі на Курган Славы, «Лінію Сталіна» і г.д.
У лагерах праходзілі «Дні духоўнасці», сустрэчы з супрацоўнікамі РАНС і РАУС.
Найлепшыя ўражанні застануцца ў школьнікаў ад удзелу ў спартыўным свяце «Малыя алімпійскія гульні», конкурсах ваенна-патрыятычнай песні.
У ліпені працаваў профільны палатачны ваенна-патрыятычны лагер «Разведчык» на тэрыторыі в/ч 89417. Выхаванцамі яго сталі навучэнцы ДУА «Сярэдняя школа № 1 пасёлка Дружны». З імі праводзіліся тэматычныя мерапрыемствы, гутаркі, дыскусіі, а таксама заняткі па баявой, медыцынскай, тактыка-спецыяльнай і тапаграфічнай падрыхтоўцы. Усё гэта было новае для хлопцаў і, безумоўна, цікава. Ва ўсякім разе, кожны з іх стаў бліжэй да разумення таго, што такое войска і вайсковы ўклад жыцця.
— У мэтах якаснай падрыхтоўкі стацыянарнага лагера да работы ў летні перыяд са сродкаў рэспубліканскага бюджэту было выдзелена 4,51 тысячы рублёў, — кажа Анжэла Васілега. — А сродкі мясцовых бюджэтаў (у тым ліку абласнога і раённага) склалі 42,42 тысячы рублёў.
Названыя сумы былі зрасходаваны на бягучы рамонт летніх домікаў, добраўпарадкаванне тэрыторыі, набыццё сантэхнікі, электратавараў, будаўнічых матэрыялаў, электрамантажныя работы, бягучы рамонт пажарнай сігналізацыі.
Пуцёўкі большасць бацькоў набывалі не за поўны кошт. Прафсаюзныя арганізацыі Пухавіцкага раёна традыцыйна даплачвалі сваім членам да поўнага кошту пуцёўкі ў стацыянарны аздараўленчы лагер «Лясная казка».
Рашэннем Пухавіцкага раённага выканаўчага камітэта ад 24 мая 2022 года №1619 «Аб арганізацыі камісіі па каардынацыі дзеянняў і вырашэнні пытанняў, звязаных з летнім аздараўленнем» была створана рабочая група па правядзенні маніторынгу аздараўленчых лагераў у летні перыяд. Усе аздараўленчыя лагеры штодзень былі ахоплены маніторынгам. Сур'ёзных заўваг па пытанні арганізацыі летняга аздараўлення не было. Таксама, як і зваротаў грамадзян па пытаннях аздараўлення дзяцей.
Бяседы, праведзеныя з навучэнцамі падчас маніторынгу аздараўленчых лагераў, паказалі, што дзецям падабаецца арганізацыя харчавання ў лагерах, а таксама сяброўская, творчая атмасфера.
«Было крута!» — так казалі многія, з'яжджаючы дадому пасля змены з планамі вярнуцца на наступны год.
Алена ІВАНОВА.
