Пад такой назвай у цэнтры творчасці дзяцей і моладзі «Світанак» прайшло дзіцячае свята.
Лічаныя дні застаюцца да пачатку новага навучальнага года. Пакуль бацькі з хваляваннем збіраюць вучняў да школы, дзеці бесклапотна праводзяць застаўшыяся летнія дні, тым больш што яны ў гэтым годзе выдаліся вельмі гарачымі.
Напярэдадні новага навучальнага года праходзіць дабрачынная акцыя «Збяры партфель у школу» па аказанні дапамогі ў падрыхтоўцы дзяцей да школы. У яе правядзенні задзейнічаны ўсе прафсаюзныя структуры раёна. У Цэнтры творчасці дзяцей і моладзі «Світанак» прайшло мерапрыемства для дзяцей, якія сёлета пойдуць першы раз у першы клас.
- Усе вы за лета добра адпачылі, загарэлі, пасталелі і зусім хутка сядзіце за школьныя парты, — сказала старшыня Пухавіцкага раённага аб'яднання прафсаюзаў Людміла Гулякевіч, звяртаючыся да будучых першакласнікаў. Яна пажадала дзеткам моцнага здароўя, добрых настаўнікаў, а бацькам сіл і цярпення.
Работнікі цэнтра творчасці дзяцей і моладзі «Світанак» падрыхтавалі для дзяцей забаўляльную праграму, а старшыні прафсаюзных арганізацый раёна ўручылі першакласнікам наборы школьных прылад і салодкія пачастункі ад ААТ «Машхарчпрад».
Са сваімі дзецьмі на свята прыйшлі работнікі ААТ «Рудзенск», ЗАТ «Марозпрадукт», УП «Жылцепласэрвіс» КГ, занальнага вузла электрасувязі , УАЗ «Мар'інагорская ЦРБ», КСУП «Зазерка» і іншыя.
Таццяна Яловая на свяце была з сынам Іллёй. Яна працуе вядучым бухгалтарам ва УП «Жылцепласэрвіс» КГ.
- Мы жывем у аграгарадку Пухавічы, — распавяла яна. - Ілля будзе вучыцца ў Пухавіцкай сярэдняй школе. Я ўжо дасведчаная мама, у нас ёсць яшчэ старэйшая дзяўчынка, таму ведаю, што падрыхтоўкай да школы варта займацца загадзя. Толькі куплю абутку я пакінула на апошнія дні жніўня, паколькі дзеці вельмі хутка растуць. Ілля вельмі хоча пайсці ў школу, а школьныя прыналежнасці, якія падрыхтавалі для нас прафсаюзы, зусім хутка яму спатрэбяцца.
Анастасія Плятнёва.