Раскажам і пакажам, як установы адукацыі ў пасёлку Праўдзінскі рыхтуюцца да пачатку навучальнага года.
З першага верасня ў Пухавіцкім раёне дзяцей прыме 54 установы адукацыі. У тым ліку 19 дзіцячых садоў, 1 гімназія, 13 сярэдніх школ, 2 базавыя школы, 4 навучальна-педагагічных комплексы дзіцячы сад-сярэдняя школа, 6 навучальна-педагагічных комплексаў дзіцячы сад-базавая школа.
Па папярэдніх дадзеных пачнуць навучанне 7364 навучэнцаў. З іх 815 — першакласнікі, 234 — 10-я класы, 216 — 11-я класы.
1 верасня ва ўсіх навучальных установах краіны празвініць першы званок. У гэты дзень у каледжах, школах, ліцэях, універсітэтах і іншых установах адукацыі стартуе чарговы новы навучальны год.
Ужо зараз дзеці вяртаюцца з летніх лагераў і пачынаюць рыхтавацца да вучобы. А работнікі ўстаноў адукацыі завяршаюць апошнія падрыхтаванні да таго, каб вучні пачалі яе ў камфортных умовах.
Пройдзем па ціхіх школьных паверхах
Для тых, хто ідзе першы раз у першы клас, Дзень ведаў — гэта новы сур'ёзны этап у жыцці. Праўдзінская сярэдняя школа плануе прыняць 30 першакласнікаў. А ўсяго ў новым навучальным годзе ў яе прыйдзе больш за 260 чалавек.
— Наша ўстанова адукацыі адкрылася ў 1968 годзе, — расказвае дырэктар школы Ірына Марцінчык. — Будынак знаходзіцца ў добрым стане, таму што касметычным рамонтам займаемся ўвесь час.
Да афармлення інтэр'ераў тут падыходзяць з крэатывам і ў адпаведнасці з сучаснымі патрабаваннямі. У гэтым годзе ўпор зрабілі на рамонце трэцяга паверха і класаў пачатковай школы, а таксама падрыхтавалі кабінет намесніка дырэктара па выхаваўчай рабоце.
Дапамогу аказалі бацькі, работнікі школы, якія прадумвалі дызайн памяшканняў. Школа зараз адыходзіць ад выкарыстання папяровых шпалер. Прымяняюцца сучасныя матэрыялы. Абнавілі каляровую гаму і ў школьнай сталовай, дзе таксама адрамантавалі харчаблок, набылі новы посуд.
— У мінулым годзе філіял «ТБЗ «Сяргеевіцкае» УП «МІНГАЗ» дапамагаў школе з мэбляй, у цяперашнім — з будматэрыяламі, — расказвае Ірына Леанідаўна. — Таксама прадпрыемства дапамагае нам абкошваць прышкольны ўчастак. А 30 жніўня нашы шэфы ў якасці падарунка плануюць арганізаваць свята, прысвечанае пачатку навучальнага года.
У Праўдзінскай школе дзейнічае кабінетная сістэма. У новым навучальным годзе адкрываецца кабінет па ваенна-патрыятычным выхаванні. IT-кампанія EPAM аказала спонсарскую дапамогу ў абсталяванні гэтага і іншых класаў: дапамаглі закупіць магнітныя дошкі, крэслы, стэлажы.
Сумесна з бацькоўскім камітэтам, педагагічным калектывам і Саветам школы была вызначана каляровая гама афіцыйна-дзелавога стылю адзення вучняў у новым годзе: у ёй будуць выкарыстоўвацца сіні і чорны колеры. На значку з эмблемай школы намаляваны сонца і кніга з надпісам: «Будзем разам думаць, шукаць, вучыцца, тварыць сябе і свет».
Практычна кожны год у школу прыбываюць маладыя спецыялісты. Сёлета да працы прыступіць выкладчыца пачатковых класаў Алена Осіпчык.
— У новы калектыў педагогі ўліваюцца даволі лёгка. Гэта вельмі актыўныя, творчыя, старанныя людзі. Многія працягваюць вучыцца ў вышэйшых навучальных установах, — кажа дырэктар школы Ірына Марцінчык.
У Праўдзінскай школе, дарэчы, ёсць педагогі, якія былі яе выпускнікамі. У гэтым годзе ўстанова адукацыі выпусціла 8 навучэнцаў, трое з якіх выбралі прафесію педагога. Ёсць надзея, што і яны вернуцца ў родную школу.
Зазірнем да дашкалятаў
У новым навучальным годзе ДУА «Праўдзінскі яслі-сад» будзе наведваць 108 чалавек. 23 дзіцяці дапоўняць першую малодшую групу. На дадзены момант яна ўжо функцыянуе.
— Для дзяцей мы стварылі развіваючае асяроддзе з дыдактычных гульняў па сэнсорыцы, таму што малым неабходна ведаць асноўныя колеры, геаметрычныя фігуры, развіваць маторыку рук. Дзецям таксама падабаюцца музычныя ігры і тэатральныя паказы. Усё гэта мы выкарыстоўваем у працы, — расказвае выхавальнік першай малодшай групы Наталля Кузіна.
Да новага навучальнага года будынак змяніўся як знутры, так і звонку. Усе запланаваныя падрыхтоўчыя работы выкананы: работнікі дзіцячага сада і бацькі прынялі актыўны ўдзел у азеляненні прылеглай тэрыторыі.
Адмысловую ўвагу надалі касметычнаму рамонту ў групах, спальнях, каморах і кабінеце выяўленчага мастацтва. А тэатральная студыя змянілася да непазнавальнасці.
Такія перамены ва ўстановах адукацыі — сапраўдны падарунак юным жыхарам пасёлка.
Алеся СМІРНОВА.
