Дыялогавую пляцоўку з удзелам маладых спецыялістаў, якія прыйшлі сёлета ў сферу дарожнай, жыллёва-камунальнай гаспадаркі, будаўніцтва і ў РАНС, арганізаваў аддзел ідэалагічнай работы, культуры і па справах моладзі райвыканкама. Яе тэма — «Значнасць моладзі ў развіцці і гісторыі Пухавіцкага раёна».
У якасці спікераў выступілі намеснік старшыні раённага выканаўчага камітэта Дзяніс Шырокі, дырэктар Мар'інагорскага вучэбна-педагагічнага комплексу дзіцячы сад-сярэдняя школа Вадзім Кушняроў, старшыня раённай арганізацыі ГА «Белая Русь» Юлія Кітаева, в.а старшыні раённага камітэта ГА «БРСМ» Святлана Зубарэвіч.
Вадзім Кушняроў распавёў хлопцам пра гісторыю Пухавіцкага раёна, пра тое, якую ролю адыгрывала моладзь у яго развіцці.
Дзяніс Шырокі спыніўся на тым, як у нашым рэгіёне развіваюцца сферы, якія прадстаўляюць маладыя людзі. Ён таксама падкрэсліў, што гатовы выслухаць, з якімі праблемамі сутыкнуліся маладыя людзі, і дапамагчы ў пераадоленні цяжкасцей.
Лідэры грамадскіх арганізацый пазнаёмілі хлопцаў са сваёй дзейнасцю, расказалі пра тое, чым для маладых людзей можа быць прывабным членства ў грамадскіх арганізацыях.
Падчас мерапрыемства размова ішла аб тым, як важна маладым людзям менавіта зараз заваяваць аўтарытэт, мець актыўную жыццёвую пазіцыю і пазітыўны настрой.
Наталля ПАРХОМЧЫК.
