У мінулую нядзелю адбылася знакавая для культурнага жыцця нашага раёна падзея: адбылася прэзентацыя зборніка «Уласным лёсам спалучаць вякі. Пухавіччына паэтычная».
У раённым цэнтры культуры сабраліся аўтары, чытачы і людзі, дзякуючы энтузіязму і настойлівасці якіх доўгачаканая кніга выйшла ў свет. Выдадзена яна ў выдавецтве «Каўчэг» (горад Мінск) пры падтрымцы дэпутата Палаты прадстаўнікоў Нацыянальнага сходу Рэспублікі Беларусь Алега Белаконева, ЗАТ «Аўгуст-Бел», ААТ «Рудзенск», ТАА «Белэкатэхніка», ГУП «Пухавіцкае ПМС». Прадмова — члена Саюза пісьменнікаў Беларусі Юрася Нератка (Юрыя Гарбачова), мастацкае афармленне — Аляксандра Чарвінскага.
Складальнікі зборніка Уладзімір Рунцэвіч, Святлана Рыжкова і рэдактар Вольга Савасцюк распавялі пра няпросты шлях яго падрыхтоўкі і выдання. Агулам гэта заняло каля пяці гадоў. Была праведзена велізарная праца: перагледжаны ўсе выпускі літаратурнай старонкі раённай газеты з канца 70-х гадоў мінулага стагоддзя, сабраны звесткі аб усіх паэтаў, якія публікаваліся ў ёй. Напрыклад, для таго, каб знайсці інфармацыю пра Канстанціна Гамана, таленавітага аўтара, які трагічна пайшоў з жыцця ў 2004 годзе, Уладзіміру Рунцэвічу прыйшлося наведаць месцы, у якіх жыў і працаваў паэт, знайсці людзей, якія яго хаця б крыху ведалі (аднак, на жаль, фатаграфію знайсці не ўдалося). Таксама была праведзена велізарная праца з аўтарамі, якія раней не публікаваліся.
Зборнік складаецца з чатырох раздзелаў. У першым, назву якому даў радок з верша Таісы Бондар «І вечна будзе доўжыцца гучанне…», прадстаўлены вершы землякоў-класікаў беларускай паэзіі, ураджэнцаў Пухаўшчыны: Алеся Бачылы (Лешніца), Захара Біралы (Раўнаполле), Генадзя Кляўко (Варанічы), Уладзіміра Ляпёшкіна (Цярэбель), Аркадыя Маркоўкi (Зазерье), Уладзіміра Хадыкi (Цiтва), Міхася Чарота (Рудзенск) ) і Таісы Бондар (Рудзенск).
Другая частка з назвай «Абрываецца песня раптам на памятнай ноце» (радок з верша Канстанціна Гамана) прысвечаны пайшоўшым з жыцця калегам па пяры. Раённае літаб'яднанне заўсёды захоўвае памяць аб сваіх таварышах: праводзяцца вечарыны, чытаюцца іх вершы. Хочацца спадзявацца, што гэтыя старонкі зборніка будуць ізноў і ізноў нагадваць аб тым, што на Пухаўшчыне жылі такія паэты, і яны заўсёды застануцца ў сэрцах сваіх родных, сяброў і чытачоў. У гэтым раздзеле прадстаўлены вершы Станіслава Асташэвіча (1943-2003), Міколы Вяршыніна (1940-2009), Канстанціна Гамана (?-2004), Аляксандра Жарнасека (1959-1995), Ігара Капцэвіча (1923-2012), Аляксандра Пікуліка (1933-1997), Міхаіла Пацыёры (1925-2020), Івана Падбярэжскага (1925-2001), Яўгенія Фіцнера (1944-2020).
Трэці раздзел — «У пошуках сваёй першаасновы» (радок з верша Аляксандра Чарвінскага) — вынік шматгадовай творчасці паэтаў Пухавіцкага раёна, якія з'яўляюцца членамі раённых літаратурных аб'яднанняў «Мар'інка» і «Сам-насам з усімі», а таксама Мiнскага абласнога народнага клуба паэтаў і кампазітараў «Жывіца». Гэтыя аўтары не толькі актыўна ўдзельнічаюць у культурным жыцці раёна (праводзяць сустрэчы з чытачамі ў навучальных установах і працоўных калектывах, творчыя вечарыны), друкуюцца на старонках «раёнкі» і ў калектыўных зборніках клуба «Жывіца», але некаторыя з іх маюць і свае аўтарскія зборнікі: гэта Вольга Савасцюк, Аляксандра Лагвіновіч, Святлана Рыжкова, Ангеліна Дабравольская, Сафія Меляшкевіч, Галіна Шаўчэнка, Уладзімір Рунцэвіч, Мікалай Марын, Іван Ешманскі , Аляксандр Чарвінскі, Міхаіл Пацыёра. На вершы Мікалая Марына, Эдуарда Білейчыка, Алены Радкевіч, Святланы Рыжковай, Людмілы Каладзінскай, Яўгена Фіцнера, Уладзіміра Рунцэвіча напісаны песні. Алесь Пісарык, Вольга Савасцюк і Уладзімір Рунцэвіч з'яўляюцца членамі Саюза пісьменнікаў Беларусі.
Акрамя названых аўтараў, у трэцім раздзеле прадстаўлены таксама вершы Станіслава Атамановіча, Анатоля Арлова, Таццяны Буцанец, Алега Бутрам'ева, Галіны Дораш, Кацярыны Зазуля, Людмілы Іваннікавай, Галіны Казычкі, Людмілы Мурашко, Алены Пархімчык, Алены Скавыш, Марыя Скапенка, Вольгі Шарпiа, Святланы Яфіменка, Валянціны Ясень (Рабiкавай).
Чацвёртая частка — «Павер у мае фарбы, каб кожным адценнем ззялі...» (радок з верша Ігара Засімовіча) – прысвечаны маладым аўтарам: Ігару Засімовічу, Ганне Каравай, Вікторыі Кавецкай, Алене Кажанка (Захаравай), Алене Рыжковай. Хочацца спадзявацца, што іх паэтычны дэбют будзе добразычліва сустрэты чытачамі і, як адзначыў у прадмове Юрась Нераток, не толькі дасць крылы натхненню, але і, магчыма, прымусіць быць больш патрабавальнымі да сваёй творчасці.
Пасля прадстаўлення калектыўнага зборніка выступілі яго аўтары: Аляксандра Лагвіновіч, Людміла Каладзінская, Аляксандр Чарвінскі, Алена Пархімчык, Эдуард Білейчык, Мікалай Марын, Анатоль Арлоў, Людміла Мурашка, Галіна Шаўчэнка, Людміла Іваннікава, Святлана Рыжкова, Уладзімір Рунцэвіч, Ангеліна Станіслаў Атамановіч, Галіна Казычка. А Мікалай Марын і Уладзімір Рунцэвіч пазнаёмілі ўдзельнікаў сустрэчы са сваімі новымі, нядаўна выдадзенымі аўтарскімі зборнікамі, і падарылі кнігі з аўтографамі.
Таксама сваімі ўражаннямі падзяліўся паэт і малады журналіст раённай газеты Станіслаў Белавусаў. Загадчыца бібліятэкі №1 імя Льва Талстога ў горадзе Мінску Лола Касакоўская запрасіла паэтаў-пухаўчан выступіць у яе бібліятэцы, а Леанід Білейчык (брат Эдуарда Білейчыка) і яго жонка Наталля распавялі, што зборнік з нецярпеннем чакаюць медыкі і пацыенты аддзялення кардыялогіі 1-й мінскай бальніцы. Алена Кажанка заклікала маладых паэтаў-землякоў больш актыўна ўдзельнічаць у літаратурным жыцці і запрасіла іх прыняць удзел у новым зборніку маладых аўтараў.
Акрамя шчырых слоў падзякі ў адрас арганізатараў сустрэчы прагучалі і прапановы аб дадрукоўцы накладу зборніка (ён усяго 70 асобнікаў), каб усе жадаючыя маглі яго набыць, а таксама аб выданні новага калектыўнага зборніка паэтаў-пухаўчан на канкрэтныя тэмы.
Пухаўшчына славіцца сваімі таленавітымі землякамі, і ёсць надзея, што іх справу прадоўжаць нашы сучаснікі, прадстаўнікі маладога пакалення.
Ангеліна МІРОНЫЧАВА.
Фота Станіслава Белавусава.
