Ініцыяваў яго правядзенне Жабінкаўскі райвыканкам. У мерапрыемстве прынялі ўдзел дэлегацыі, які прадстаўлялі Дзяржынск, Заслаўе, Лагойск, Смалявічы, Фаніпаль, Скідзель і Рудзенск. Яны сабраліся, каб абмяняцца вопытам і абмеркаваць шляхі развіцця гарадоў-спадарожнікаў. Наш раён прадставіла намеснік старшыні райвыканкама Наталля Літвінчук.
Наталля Літвінчук падпісвае пагадненне аб супрацоўніцтве ў галіне ЖКГ і будаўніцтва з Жабінкаўскім райвыканкамам
Пунктамі росту і развіцця назваў гарады-спадарожнікі міністр эканомікі Беларусі Аляксандр Чарвякоў, які прыняў удзел у працы форуму. Ён адзначыў, што урад уважліва сочыць за развіццём такіх гарадоў. Для камфортнага пражывання і стварэння ў іх працоўных месцаў робіцца нямала. Ёсць праблемы, якія стрымліваюць развіццё гарадоў-спадарожнікаў, таму неабходна сістэмна падыходзіць да іх вырашэння. А станоўчы вопыт актыўна пераймаць адзін у аднаго. У кожнай тэрыторыі ёсць свой патэнцыял і канкурэнтныя перавагі, якія павінны стаць лакаматывам развіцця.
Аляксандр Чарвякоў таксама адзначыў, што шэсць з васьмі гарадоў-спадарожнікаў дэманструюць прырост насельніцтва: «Указ Кіраўніка дзяржавы, які быў прыняты ў 2014 годзе, спрацаваў. З васьмі гарадоў-спадарожнікаў у шасці на працягу пяці гадоў назіраем прырост насельніцтва: больш за тысячу чалавек у кожным з гэтых гарадоў. Гэта сведчыць аб тым, што створаныя там умовы аказалі пазітыўны ўплыў на прыток насельніцтва». Аляксандр Чарвякоў дадаў, што пакуль дэмаграфічны прырост не паказваюць Рудзенск і Скідзель.
Сярод станоўчых момантаў міністр эканомікі назваў даступнае жыллё і якасную інфраструктуру, што ў першую чаргу ўплывае на прыток насельніцтва. Пры гэтым ён звярнуў увагу на праблему, звязаную з працоўнымі месцамі.
«Кіраўнік дзяржавы паставіў задачу, каб у кожным раёне былі створаны вытворчасці колькасцю не менш за сто чалавек альбо некалькі такіх вытворчасцяў. Задача павінна вырашацца. У гэтым кірунку ўрад разам з мясцовымі органамі ўлады будзе актыўна працаваць, каб жыхары ў гадзіннай блізкасці мелі працу, маглі перамяшчацца і забяспечваць дастатак у сям'і», - сказаў Аляксандр Чарвякоў.
На форуме быў падпісаны шэраг пагадненняў аб супрацоўніцтве.
Па матэрыялах БелТА
