Адпачыць… у войску. Ці магчыма такое?
Пра гэта раскажуць навучэнцы СШ №1 пасёлка Дружны, якія частку канікул правядуць у профільным палатачным ваенна-патрыятычны лагеры «Разведчык», разгорнутым на тэрыторыі в/ч 89417. Пяцьдзесят хлапчукоў і дзяўчынак 12-14 гадоў акунуцца ў атмасферу армейскага жыцця з дапамогай прафесійных вайскоўцаў. Для многіх свет вайсковага жыцця стане адкрыццём. І гэта ўжо цудоўныя ўспаміны пра лета.
— Асноўнымі напрамкамі работы ў лагеры з'яўляецца ваенна-патрыятычнае выхаванне дзяцей, духоўна-маральнае выхаванне і спартыўна-аздараўленчая работа, расказвае спецыяліст упраўлення па адукацыі, спорце і турызме райвыканкама Дарына Дароўская.— Дні школьнікаў будуць распісаны па хвілінах. У вайсковым распарадку дня будуць запланаваны тэматычныя мерапрыемствы, гутаркі, канцэрты, дыскусіі, а таксама заняткі па баявой, тактыка-спецыяльнай, медыцынскай, тапаграфічнай падрыхтоўцы, ваенна-спартыўныя гульні. Пройдзе турнір «Я грамадзянін Рэспублікі Беларусь». Напэўна, хлопцам не будзе сумна. А новыя веды, навыкі і ўменні спатрэбяцца ў будучыні.
Алена ШАНТЫКА
