Цытата: «Для Беларусі і Расіі форум даўно стаў адным з сімвалаў роднасці славянскіх народаў. Само жыццё паказвае, што мы знайшлі фармат міжрэгіянальнага і міждзяржаўнага ўзаемадзеяння, які сапраўды адпавядае карэнным інтарэсам беларусаў і расіян. Больш за тое, форум з'яўляецца эфектыўным і адэкватным адказам на новыя выклікі, з якімі мы сутыкнуліся сёння».
Аляксандр Лукашэнка.
ААТ «Рудзенск» у складзе калектыўнага стэнда ААТ «БАТЭ» прыняла ўдзел у 9-ым Форуме рэгіёнаў Беларусі і Расіі «Роля міжрэгіянальнага супрацоўніцтва ў паглыбленні інтэграцыйных працэсаў Саюзнай дзяржавы», які праходзіў у Гродне.
— Удзел у Форуме рэгіёнаў ААТ «Рудзенск» прыняло ўпершыню, — кажа дырэктар прадпрыемства Андрэй Салановіч. — Прадпрыемства прадставіла сваю святлотэхнічную прадукцыю, у тым ліку ўзоры апошніх дасягненняў. Сярод іх: галагенавыя і святлодыёдныя фары блізкага і далёкага святла, аналагі нямецкага вытворцы аўтамабільных дэталяў Hella, ліхтары заднія і пярэднiя для сельскагаспадарчай тэхнікі ў новым дызайне, фары працоўнага асвятлення ў святлодыёдным выкананні.
— Выстава была вельмі цікавай і разнастайнай, — дзеліцца ўражаннем аб выставе цяжкай прамысловасці Беларусі начальнік аддзела маркетынгу ААТ «Рудзенск» Алег Ленько. — Прадукцыя нашага прадпрыемства выклікала зацікаўленасць як ва ўдзельнікаў Форума з расійскага боку, так і ў прадстаўнікоў нашых айчынных прадпрыемстваў, якія пакуль не з'яўляюцца нашымі партнёрамі. Асаблівую цікавасць выклікала імпартазамяшчальная прадукцыя: фары блізкага і далёкага святла ў лямпавым і святлодыёдным выкананні — аналагі нямецкага вытворцы Hella.
Удзел у такіх мерапрыемствах — гэта не толькі спосаб знайсці новых бізнэс-партнёраў, гэта таксама абмен ведамі, навыкамі і досведам у фармаванні тых самых партнёрскіх кантактаў.
Яўгенія ВАЖНІК
