«З любоўю да цябе, мая Беларусь», - пад такім слоганам у Мар'інай Горцы прайшло святочнае мерапрыемства, прысвечанае Дню Незалежнасці Рэспублікі Беларусь і 78-годдзю вызвалення рэспублікі ад нямецка-фашысцкіх захопнікаў.
Цэнтр святкавання сёлета размясціўся на вуліцы Ленінская. Тут была ўсталявана цэнтральная сцэна, на якой прайшлі афіцыйныя моманты святочнай праграмы.
Удзельнікаў і гасцей мерапрыемства павіншавалі старшыня раённага выканаўчага камітэта Віктар Каляда, намеснік кіраўніка адміністрацыі Дзмітраўскай гарадской акругі Маскоўскай вобласці Святлана Тарасава, кіраўнік адміністрацыі Прохараўскага раёна Белгародскай вобласці Сяргей Канішчаў.
Прайшла цырымонія ўзнагароджання: узнагароды атрымалі лепшыя працаўнікі нашага раёна, пераможцы конкурсу на лепшую кампазіцыю па азеляненні і добраўпарадкаванні тэрыторый, які быў аб'яўлены ў нашым раёне да Дня Незалежнасці Рэспублікі Беларусь.
Працягнула святочнае мерапрыемства тэатралізаванае прадстаўленне «Тыя далёкія 40-я...», якое перайшло ў святочнае шэсце прадстаўнікоў працоўных калектываў раёна і парад тэхнікі.
Наталля Пархомчык.