Напярэдадні прафесійнага свята для работнікаў прадпрыемства адбыўся святочны канцэрт. У гэты дзень у адрас завадчан са сцэны гучала шмат добрых слоў і самых шчырых пажаданняў. Святочны настрой усім прысутным у зале дарылі салісты, музычныя і танцавальныя калектывы Дружненскага Дома культуры і гумарыстычны гурт «Сяброўкі» Дукорскага СДК.
Сярод гасцей — намеснік старшыні канцэрна «Белнафтахім» Уладзімір Сізоў. Уладзімір Васільевіч адзначыў важнасць завадской прадукцыі, павіншаваў прысутных у зале з днём хіміка і ўручыў ганаровую грамату аператару тэхналагічных установак цэха па вытворчасці парафіна Сяргею Мязько. Не засталася ў баку і Мінская абласная арганізацыя «Белхімпрафсаюз»
Цырымонія ўзнагароджання — гэта неад'емная традыцыя любога свята, а яшчэ добрая нагода падкрэсліць каштоўнасць і прафесійныя якасці супрацоўнікаў. А ўзнагарод, як вядома, шмат не бывае.
Начальнік аддзела эканомікі Пухавіцкага раённага выканаўчага камітэта Ала Сушко адзначыла дасягненні прадпрыемства і стабільную якасць выпускаемай прадукцыі ўзнагародай Дзяржстандарта. А таксама ад камітэта ўручыла дырэктару ААТ «Завод горнага воску» Уладзіміру Маркаву дыплом лаўрэата конкурсу «Лепшыя тавары Рэспублікі Беларусь», дзе лепшымі сталі парафінавая эмульсія «Белвакс» і змазачная астуджальная вадкасць «Belwax-100». Падзякі старшыні Пухавіцкага райвыканкама атрымалі апаратчык змешвання Павел Апаровіч і кантралёр якасці Аліна Бярдзюгіна.
Не абышлося без узнагарод Мінскай абласной арганізацыі «Белхімпрафсаюз» і першаснай прафсаюзнай арганізацыі ААТ «Завод горнага воску».
Кіраўніцтва завода шануе працу і дасягненні сваіх супрацоўнікаў. Уладзімір Іванавіч выказаў падзяку ўсяму працоўнаму калектыву і ўручыў ганаровыя граматы лепшым работнікам завода, з унясеннем іх імёнаў на дошку гонару прадпрыемства.
Трэба адзначыць, што ўвага на Заводзе горнага воску надаецца не толькі супрацоўнікам, але і іх дзецям, бо магчыма сярод іх падрастаюць новыя спецыялісты. Напярэдадні прафесійнага свята былі падведзены вынікі дзіцячага конкурсу, які праходзіў на прадпрыемстве і быў прымеркаваны да Года гістарычнай памяці. Дзеці атрымалі дыпломы і памятныя падарункі.
Яўгенія ВАЖНІК.
