Шчыра. Душэўна. Патрыятычна. Так у трох словах можна ахарактарызаваць свята, прысвечанае заканчэнню навучальнага года, якое адбылося ў Дрычынскай базавай школе. На ім апошні школьны званок прагучаў для васьмі дзясяткаў вучняў, у тым ліку 11 выпускнікоў 9 класа.
Для школы мінулы навучальны год быў напоўнены добрымі справамі, дасягненнямі ў вучобе, спорце, грамадскім жыцці. Пра гэта сведчылі граматы і падзякі, якія навучэнцам уручыла дырэктар школы Святлана Багачова. І сама школа атрымала падарунак: павіншаваць дзяцей, настаўнікаў, бацькоў з заканчэннем навучальнага года прыехала намеснік старшыні раённага выканаўчага камітэта Наталля Чарнышова, якая ўручыла ўстанове адукацыі сертыфікат на набыццё новага камп'ютарнага класа.
На ўрачыстай лінейцы прагучалі цёплыя словы наказу выпускнікам ад старшыні Дукорскага сельвыканкама Святланы Ляшковіч, настаўнікаў, бацькоў. А навучэнцы школы падрыхтавалі для ўсіх удзельнікаў свята музычныя падарункі. Стварылася ўражанне, што літаральна ўсе вучні сталі ўдзельнікамі альбо вакальных, альбо танцавальных нумароў. У завяршэнні мерапрыемства выпускнікі разам з першакласнікамі ўсклалі кветкі да помніка загінуўшым у гады Вялікай Айчыннай вайны землякам — у школе гэта стала ўжо традыцыяй.
