У рамках комплекса мерапрыемстваў па патрыятычным выхаванні Міністэрства культуры сумесна з музеем гісторыі Вялікай Айчыннай вайны распрацавала мабільную экспазіцыю. У гэтым годзе, у Год гістарычнай памяці, яна называецца «Дарога памяці». Перасовачны музейны комплекс здзяйсняе маршрут па розных гарадах Беларусі, што дазваляе жыхарам аддаленых куткоў пазнаёміцца з гісторыяй нашай краіны і падзеямі Вялікай Айчыннай вайны.
Экспазіцыя музея складаецца з трох асноўных частак. Першая частка адлюстроўвае пачатак ваенных дзеянняў на савецка-германскім фронце. Усе фатаграфіі, прадстаўленыя ў музейным комплексе, — гэта фатаграфіі ўраджэнцаў Беларусі, якія вызначыліся на перадавой. Другі раздзел прысвечаны партызанскаму і падпольнаму руху на тэрыторыі нашай краіны. У вітрынах знаходзяцца сапраўдныя экспанаты з фондавых сховішчаў музея, якія раней не былі прадстаўлены публічна. Трэці раздзел прысвячаецца вызваленню Беларусі і Еўропы. У гэтым годзе тут прадстаўлены каштоўныя прадметы, якія былі знойдзены ў лагеры смерці «Трасцянец».
Кацярына Паштальёнава, навуковы супрацоўнік музея Вялікай Айчыннай вайны расказала:
— У гэтым годзе мы дадалі некалькі дадатковых тэм, адна з якіх — подзвіг фотакарэспандэнтаў і кінарэжысёраў на перадавой. Дзякуючы гэтым людзям наш музей мае вялікую колькасць фота і кінаматэрыяла.
Работнікі «Пухавіцкай цэнтральнай раённай бібліятэкі» пры ўдзеле супрацоўнікаў «Пухавіцкага раённага краязнаўчага музея» падрыхтавалі акцыю «Нашчадкі кажуць дзякуй…», дзе кожны жадаючы можа напісаць словы падзякі на яблыневых кветках людзям, якія падарылі нам свет без вайны. Таксама бібліёграфы сабралі біяграфічныя дадзеныя пісьменнікаў Пухаўшчыны, якія прайшлі праз вайну, і размясцілі іх вершы на інфармацыйных стэндах, каб пазнаёміць маладое пакаленне з творчасцю герояў-землякоў.
Алеся ГВАРДЗIЯН.
