На ААТ «Рудзенск» многія работнікі працуюць ужо не адно дзесяцігоддзе. Напрыклад, стаж работы вядучага інжынера-тэхнолага Жанны Кізляк — 40 гадоў.
Сваю працоўную дзейнасць Жанна Канстанцінаўна ў ААТ «Рудзенск» пачала пасля заканчэння Беларускага дзяржаўнага тэхналагічнага інстытута. З першага дня акунулася ў самую гушчу вытворчага працэса і праявіла сябе граматным і адказным спецыялістам.
У 1993 годзе была прызначана на пасаду намесніка галоўнага тэхнолага, на якой нязменна прапрацавала да 2016 года. Цяпер займае пасаду вядучага інжынера-тэхнолага.
Жанна Канстанцінаўна ўдзельнічала ў мадэрнізацыі вытворчасці і рэалізацыі самых значных праектаў, дзякуючы якім ААТ «Рудзенск» кардынальна памяняў напрамак дзейнасці, стаў адным з вядучых вытворцаў аўтамабільнай святлатэхнікі ў Рэспубліцы Беларусь і вядомым пастаўшчыком у краінах блізкага замежжа.
У 1995 годзе дзякуючы працы Жанны Кізляк былі ўкаранёны новыя тэхналогіі вырабу аўтамабільных ліхтароў і іншай святлотэхнічнай прадукцыі, а ў 2013 — па вытворчасці рэфлектараў і аўтамабільных фар. Таксама Жанна Канстанцінаўна прымала непасрэдны ўдзел ва ўкараненні і падтрыманні функцыянавання на прадпрыемстве сістэм менеджменту якасці на адпаведнасць ISO 9001, IATF 16949.
Жанна Канстанцінаўна як вопытны спецыяліст у галіне ліцця пластмас пад ціскам выконвае найбольш адказныя задачы ў аддзеле галоўнага тэхнолага, ахвотна дзеліцца багатым вопытам з маладымі спецыялістамі-тэхнолагамі і іншымі калегамі па прадпрыемстве. Прынцыповая і адказная, добразычлівая і камунікабельная — так аб ёй адклікаецца кіраўніцтва прадпрыемства.
Начальнік аддзела тэхнічнага кантролю Алена Міхалевіч прыйшла на прадпрыемства ў 2009 годзе пасля заканчэння Беларускага дзяржаўнага тэхналагічнага ўніверсітэта інжынерам-тэхнолагам у цэх па вытворчасці святлотэхнічных вырабаў, дзе сустрэла свайго будучага мужа — інжынера па эксплуатацыі і рамонце абсталявання Аляксандра Міхалькова.
Алена з першых дзён зарэкамендавала сябе граматным спецыялістам, і ў 2020 годзе была прызначана начальнікам аддзела тэхнічнага кантролю. Галоўнай задачай аддзела з'яўляецца кантроль якасці вырабаў.
Па словах намесніка дырэктара па якасці Віктара Надольскага, Алена ўмее граматна размеркаваць абавязкі паміж падначаленымі, а яе высокая ступень адказнасці дазваляе кіраўніцтву прадпрыемства быць упэўненымі ў тым, што выпускаемая прадукцыя дакладна адпавядае ўсім патрабаванням міжнароднага стандарту для вытворцаў камплектуючых аўтамабільнай прадукцыі.
У гэтым годзе спаўняецца пяць гадоў, як на прадпрыемстве добрасумленна працуе начальнік энергамеханічнага аддзела Андрэй Фарафонаў. За перыяд сваёй працоўнай дзейнасці Андрэй Сяргеевіч унёс значны ўклад у забеспячэнне працаздольнасці і развіцця інжынернай інфраструктуры ЭМА ААТ «Рудзенск». У перыяд 2020-2021 гадоў арганізаваў і забяспечыў аператыўнае і якаснае выкананне работ аддзела па падрыхтоўцы і мантажы інжынерных сетак на дзеючых вытворчых участках, увёў у эксплуатацыю 5 адзінак новых тэрмапластаўтаматаў. Штодзень пад кіраўніцтвам Андрэя Фарафонава калектывам энергамеханічнага аддзела забяспечваецца бесперабойная работа ўсіх інжынерных сетак прадпрыемства: электразабеспячэнне, водазабеспячэнне, тэхнічны стан і бягучы аператыўны рамонт тэхналагічнага абсталявання. У калектыве заўсёды сяброўская, добразычлівая атмасфера, не бывае праблем з дысцыплінай.
Ніводнае прадпрыемства, арганізацыя, установа не могуць функцыянаваць без людзей, якія адказваюць за навядзенне і падтрыманне парадку. Гэта штодзённая праца, якую выконвае на заводзе Святлана Гаўрыкава. Яна працуе ў цэху вытворчасці рэфлектараў і аўтамабільных фар. Дзякуючы акуратнасці, цярпенню і добрасумленнасці Святланы Генадзеўны там заўсёды парадак і выкананы ўсе санітарныя нормы. Гэта асабліва важна ў перыяд цяперашняга эпідэміялагічнага становішча. Дарэчы, менавіта ў цэху ВРiАФ быў адзін з самых нізкіх паказчыкаў захворвання COVID-19 і, на думку начальніка цэха Андрэя Ракіцкага, гэта шмат у чым заслуга Святланы Гаўрыкавай.
Станіслаў Белавусаў.
