Памятаць і ўлічваць урокі гісторыі
У дзень памяці ахвяр Хатыні, які прыпадае на 22 сакавіка, у ДУА “Сярэдняя школа №3 г Мар'іна Горка” прайшоў урок мужнасці “Хатынь. Боль і памяць”. У ім прынялі ўдзел намеснік старшыні Пухавіцкага райвыканкама Наталля Чарнышова і пракурор Пухавіцкага раёна Дзмітрый Лугін.
— Сёння сумная дата ў гісторыі нашай дзяржавы, — адзначыў у сваім выступленні Дзмітрый Лугін. — 22 сакавіка 1943 года нямецкія акупанты і іх памагатыя сцерлі з зямлі вёску Хатынь. Згарэўшы жыўцом, лютую смерць прынялі 149 бязвінных ахвяр, сярод якіх больш за палову былі дзеці. Трагедыя Хатыні – не выпадковы эпізод вайны, а адзін з тысячы фактаў, якія сведчаць аб мэтанакіраванай палітыцы генацыду гітлераўскай Германіі ў адносінах да насельніцтва Беларусі. Страшны лёс знішчэння разам з Хатынню падзялілі звыш 9 тысяч сёл і вёсак Беларусі. Некаторыя з іх, спаленыя разам з людзьмі, як і Хатынь, пасля вайны ўжо не адрадзіліся. Такія вёскі ёсць і ў нашым раёне.
Дзмітрый Анатольевіч адзначыў, што расследаванне генацыду беларускага народа ў гады Вялікай Айчыннай вайны, несумненна, з'яўляецца данінай памяці загінуўшым, бязвінна знішчаным грамадзянам нашай краіны. Адначасова нацэлена на забеспячэнне захавання прынцыпаў непазбежнасці адказнасці, аднаўлення гістарычнай і сацыяльнай справядлівасці, абарону інтарэсаў беларусаў, служыць рэалізацыі антыфашысцкага прынцыпу “Ніколі больш!”.
Навучэнцы школы падрыхтавалі кранальны нумар “Запаліце свечкі”. Памяць загінуўшых прысутныя ўшанавалі хвілінай маўчання.
Анастасія ПЛЯТНЁВА.
