- Выдатна, што напярэдадні кожнага новага года кіраўнікі рэспубліканскіх органаў дзяржкіравання, мясцовых выканаўчых і распарадчых органаў наведваюць дзіцячыя інтэрнатныя ўстановы, апякунскія і прыёмныя сем'і, бальніцы, каб павіншаваць хлопцаў са святам, уручыць ім падарункі, паглядзець, як жывуць хлапчукі і дзяўчынкі, даведацца, што іх хвалюе, радуе і турбуе,— сказаў, звяртаючыся да юных пухаўчан Уладзімір Пярцоў.— Мне асабліва прыемна сёння ўручыць вам не толькі салодкія падарункі, але і кнігі ад выдавецкага дома «Зорка», таму што нават у стагоддзе цыфравізацыі, кампутараў і гаджэтаў «жывая», сапраўдная, кніга застаецца самым выдатным падарункам.
Міністр інфармацыі ў суправаджэнні дырэктара «SOS-дзіцячая вёска Мар'іна Горка» Дзмітрыя Калтовіча азнаёміўся з умовамі, у якіх жывуць і выхоўваюцца дзеці, і наведаў SOS-сям'ю.
Тэатралізаванае казачнае прадстаўленне з удзелам навагодніх персанажаў чарговы раз прайшло не ў зале, а на вуліцы. І хоць Зіма не збіралася ўдзельнічаць у свяце з-за каранціну, яно адбылося. Былі песні, танцы, карагоды. Была прыгажуня-ёлка, была Снягурка і Дзед Мароз. А таму скончылася свята па-навагодняму традыцыйна: кожная SOS-сям'я атрымала падарункі.
Алена ШАНТЫКА.