У раённым цэнтры культуры прайшло навагодняе мерапрыемства «Цуды пад новы год», на якім сабраліся лепшыя вучні ўсіх 26 устаноў адукацыі нашага раёна. Гэта пераможцы раённых, абласных, рэспубліканскіх алімпіяд, творчых конкурсаў, спартыўных спаборніцтваў і дзеці са шматдзетных сем’яў. У гэты ж дзень мерапрыемства прайшло і для дзяцей-інвалідаў, дзяцей з прыёмных, апякунскіх сем’яў. Для іх працаўнікі раённага цэнтра культуры падрыхтавалі інтэрактыўнае мерапрыемства і навагоднюю казку «Выкрадальнікі часу», якія вельмі спадабаліся дзецям.
Старшыня раённага выканаўчага камітэта Віктар Каляда павіншаваў хлопчыкаў і дзяўчынак з самым чароўным надыходзячым святам і ўручыў навагоднія падарункі. — У гэтай зале сабраліся адны з самых лепшых дзяцей нашага раёна: наймацнейшыя спартсмены, самыя таленавітыя артысты, выдатнікі вучобы, пераможцы алімпіяд, — адзначыў Віктар Міхайлавіч.— Мне вельмі прыемна, што такіх дзяцей у гэтай зале вельмі шмат. Вялікі дзякуй за вашыя старанні і поспехі. Я ўпэўнены, што вы будзеце годнымі грамадзянамі нашай Рэспублікі Беларусь.
Анастасія ПЛЯТНЁВА.