Сустрэча адбылася ў знакавым для раёна месцы - на Алеі вайсковай славы, дзе сабраліся школьнікі, прадстаўнікі працоўных калектываў, ветэраны.
- Акцыя «Сімвал адзінства» праходзіць па ўсёй Рэспубліцы Беларусь. Мы рады сёння вітаць Вас, дарагія ўдзельнікі, на Пухаўшчыне,— сказала, звяртаючыся да ўдзельнікаў аўтапрабегу, намеснік старшыні райвыканкама Наталля Чарнышова.- Мы хочам выказаць вам вялікую падзяку за тое, што вы робіце, сваім прыкладам паказваючы: мы адзіныя, мы - адзін народ. Ваша перакананасць дапаможа захаваць мір у нашай краіне і дасць магчымасць заставацца ёй такой жа моцнай, квітнеючай і незалежнай. У гонар Дня народнага адзінства я хачу пажадаць усім моцнага здароўя, поспеху і росквіту! Мы - беларусы! Наша сіла ў нашым адзінстве!
Удзельнікам аўтапрабегу быў перададзены мяшочак са збожжам - уклад у агульны каравай ад хлебаробаў Пухаўшчыны.
Калона з аўтамабіляў жыхароў нашага раёна далучылася да ўдзельнікаў акцыі.
Яе ўдзельнікі дзеляцца сваімі эмоцыямі і кажуць аб любові да сваёй краіны:
- Мы пабывалі ў розных гарадах, пераканаліся, што ўсюды жывуць добрыя гасцінныя людзі, якія нас сустракалі з радасцю і адкрытай душой. Прыемна адчуваць гэта дачыненне, гэта адзінства поглядаў, настрояў і жаданняў. Мы ўсе хочам мiру, незалежнасці, упэўненасці ў заўтрашнім дні.
Станіслаў Белавусаў