У партызанскім краі…
Калісці месцаў, дзе былі адноўлены партызанскія зямлянкі, у раёне было некалькі. І гэта цалкам вытлумачальна: Пухаўшчына - край партызанскі. Тут пастаянна грунтавалася і дзейнічала некалькі буйных злучэнняў народных мсціўцаў. Праз некаторы час пасля заканчэння Вялікай Айчыннай вайны былыя партызаны пачалі праводзіць сустрэчы ў знакавых для сябе месцах. І там аднавілі зямлянкі, каб і самім успомніць баявую маладосць, і паказаць сваім дзецям і ўнукам, у якіх умовах яны жылі і ваявалі.
Для былых партызан брыгады «Полымя», іх родных і блізкіх, жыхароў бліжэйшых вёсак, якія перажылі жахі акупацыі, такім месцам стала ўрочышча Баруслава. Тут размешчаны партызанскія могілкі, дзе пахаваны загінуўшыя ў гады Вялікай Айчыннай вайны народныя мсціўцы і мірныя жыхары - усяго 350 чалавек. Побач з ім былі адноўлены дзве партызанскія зямлянкі.
Час не шкадуе ні людзей, ні тое, што было зроблена іх рукамі. Насцілы зямлянак паваліліся, перакрыўшы ўваход у іх. Па просьбе неабыякавых мясцовых жыхароў выправіць гэта вырашылі вайскоўцы вайсковай часці 89417, якія ўзялі шэфства над мемарыяльным комплексам. Дапамагаў ім Пухавіцкі лясгас, які забяспечыў неабходнай драўнінай.
Наталля Пархомчык.