Першы педагагічны студ-атрад «Чайка» пачаў сваю дзейнасць у аздараўленчым лагеры «Лясная казка», дзе студэнты і маладыя педагогі ад 18 да 31 года працавалі выхавацелямі. Яны актыўна вялі старонку ў Instagram пра жыццё ў лагеры, арганізоўвалі танцы, конкурсы, вясёлыя зарадкі, флэшмобы. Рабілі ўсё, каб дзецям не было калі сумаваць. Студатрадаўцы - маладыя і актыўныя, таму лёгка знайшлі агульную мову з дзецьмі, якія адпачывалі ў аздараўленчым лагеры ў першую змену. І дырэктар лагера Кацярына Савіра падтрымлівала ідэі моладзі. Зараз у «Лясной казцы» працуе другі студэнцкі атрад.
- Сёлета мы ўпершыню арганізавалі студэнцкі экалагічны атрад у экапарку «Акварэль», - распавядае першы сакратар РК ГА «БРСМ» Алена Мазанік. - Тут працаўладкавана 20 чалавек ва ўзросце 14-15 гадоў, навучэнцаў з гарадскіх і сельскіх школ. Прымаючая арганізацыя прапанавала хлопцам працу па добраўпарадкаванні тэрыторыі. Арганізавала падвоз на ўласным транспарце. Гэта праца зацікавіла не толькі дзяцей, але і іх бацькоў. На месца ў атрадзе ўтварыўся конкурс.
Усе студатрады працуюць мінімум 10 дзён. Згодна з артыкулам 115 Працоўнага кодэкса Рэспублікі Беларусь, падлеткі павінны працаваць няпоўны працоўны дзень.
- Ахвотных шмат: больш за 160 заявак ужо пададзена на садзейнічанне ў працаўладкаванні — адзначае Алена Анатольеўна. — Раённы камітэт ГА «БРСМ» запрашае паўналетніх дзяцей на працу ў якасці камандзіраў і камісараў студэнцкіх атрадаў і гарантуе стопрацэнтнае працаўладкаванне ў летні перыяд.
Тамара Батурэвіч сёлета скончыла 9-ы клас сярэдняй школы №3 горада Мар'іна Горка. Дзяўчына плануе звязаць сваё жыццё з працай па добраўпарадкаванні. Паступіла ў каледж на спецыяльнасць «Азеляняльнік-кветкавод». У студэнцкім атрадзе працуе ўжо не першы раз.
— Мне падабаецца так бавіць свой вольны час, — кажа Тамара. — Ужо нават вырашыла, на што заробленыя грошы патрачу: куплю падарункі сваім родным, сее-тое — для сябе.
Шмат планаў і ва ўдзельніцы студатрада Наталлі Зязюльчык.
- Патрачу грошы на асабістыя мэты, на падарункі, - кажа дзяўчына. - Праца тут зусім не цяжкая, ды і ў кампаніі нам працаваць весялей.
Аплата працы ў студатрадаўцаў годная, таму шматлікія імкнуцца скарыстацца магчымасцю зарабіць. Да таго ж, праводзіць час з сябрамі нашмат цікавей, чым сядзець дома за кампутарам. Прымаць на працу студатрады сёлета будуць Мар'інагорскі аграрна-тэхнічны каледж, будаўнічая арганізацыя ТАА «Пухавіцкае «МПМК-14», ААТ «Рудзенск». Наступнымі пачнуць працу экалагічныя атрады ва УП «Жылцепласэрвіс» КХ і ДЛГУ «Пухавіцкі лясгас».
Анастасія Плятнёва.
