Наталля Мігуцкая.
Імператрыца Кацярына II у мюзікле «Дарэчы пра Дзіканьку», прынцэса Фіёна і Баба-Яга ў навагодніх спектаклях, Скамарох ... За час працы ў раённым Цэнтры культуры Наталля Мігуцкая «прымерыла» дзясяткі розных вобразаў. Але менавіта такія ролі, дзе можна быць смешны і вясёлай, мастацкі кіраўнік запомніла больш за ўсё. За магчымасць быць рознай на сцэне, за тое, што кожны новы працоўны дзень не падобны на папярэдні, Наталля і любіць сваю працу.
- І за дружны калектыў, - дадае суразмоўца. - Мне пашанцавала працаваць у коле творчых і крэатыўных маладых хлопцаў.
У раённым Цэнтры культуры сапраўды працуе практычна адна моладзь. Раённыя і гарадскія мерапрыемствы, канцэрты... Работнікі культуры заўсёды навідавоку. Тое, што мы бачым на сцэне, - гэта вынік доўгіх рэпетыцый і падрыхтоўчай працы, схаваных ад вачэй гледачоў…
- Усе дэкарацыі і касцюмы мы робім самі — распавядае мастацкі кіраўнік РЦК Наталля Мігуцкая. - Нядаўна набылі новую швейную машынку і, як аказалася, мы ўсе ўмеем нядрэнна шыць. З кожным разам атрымліваецца ўсё лепш.
Аб работніках цэнтра культуры з гонарам распавядае і яго дырэктар Аксана Жаромская. Крэатыўныя, таленавітыя, энергічныя - так Аксана Гіўеўна гаворыць пра кожнага, падкрэсліваючы, што хлопцы прыйшлі сюды па ўласным жаданні.
- Вельмі ганаруся нашай моладдзю. Прыемна, што яны прыйшлі не па размеркаванні, а па закліку сэрца, — працягвае Аксана Жаромская. - Я лічу, што ў сферы культуры павінна працаваць моладзь. Каму, як не ім, ствараць нешта новае і здзіўляць гледача.
Гледачы ўжо палюбілі і запомнілі многіх культработнікаў. Данііл Халецкі - вядучы практычна ўсіх раённых мерапрыемстваў. У РЦК ён прыйшоў яшчэ школьнікам. Творчае жыццё маладому чалавеку спадабалася, і Данііл паспяхова сумяшчае яго з вучобай у Беларускім дзяржаўным універсітэце культуры і мастацтваў. У наступным годзе малады чалавек атрымае дыплом, і, думаю, не трэба ўдакладняць, куды ён прыйдзе працаваць па размеркаванні.
Міхаіл Кляўко, Анастасія Абакунчык, Юлія Буткевіч, Данііл Халецкі, Юлія Смаляк, Аліна Есіпянок, Марына Рыжова.
Падобная гісторыя і ў Міхаіла Кляўко. У 11-м класе ён выпадкова прыйшоў з сябрамі ў антыкафэ ў РЦК і, як той казаў, застаўся. Міхаіл вучыцца на другім курсе ў універсітэце культуры і мастацтваў. Любіць сучасную харэаграфію і сцэну. У Міхаіла, дарэчы, ёсць акцёрскі вопыт. У адным спектаклі ён аднойчы сыграў дзве ролі: у мюзікле «Дарэчы пра Дзіканьку» малады чалавек выходзіў на сцэну ў вобразе дзяка і ў вобразе князя Пацёмкіна.
- Усе мы яшчэ са школьных гадоў прыходзілі ў Палац культуры — кажа метадыст Юлія Буткевіч. - Мы з Юліяй Смаляк наведвалі тут гурткі. Анастасія Абакунчык была ўдзельніцай тэатральнай студыі ў гімназіі, а прыйшла ў сферу культуры па прыкладзе мамы. Цяпер больш за ўсё ёй падабаецца займацца арганізацыяй маладзёжных мерапрыемстваў. Аліна Есіпянок калісці вучылася харэаграфіі ў нашых педагогаў, а цяпер сама выкладае. Так што наш прыход у сферу культуры - хутчэй заканамернасць, а не выпадковасць.
У жніўні творчы калектыў папоўніла малады спецыяліст Марына Рыжова. Дзяўчына - мастак-афарміцель. Цяпер яна распісвае адну з сцен у цэнтры культуры. А першым заданнем для дзяўчыны было афармленне кампазіцыі да абласных «Дажынак» у Чэрвені, якая была размешчаная на выездзе з горада.
Пандэмія, звязаная з каранавірусам, унесла ў гэтым годзе свае карэктывы ў культурнае жыццё раёна. Але не спыніла яго. Метадысты РЦК перайшлі ў анлайн-фармат. Акцэнт зрабілі на гуртковай дзейнасці. Аліна Есіпянок, напрыклад, праводзіла майстар-класы па дызайне і распавядала, пры дапамозе якіх практыкаванняў можна дамагчыся стройнай і падцягнутай фігуры. Юлія Смаляк захапляецца цырульніцкім мастацтвам і дзялілася сакрэтамі стварэння прычосак.
Паралельна з анлайн-праектамі артысты працавалі над новымі спектаклямі і мюзікламі. Усіх карт работнікі культуры пакуль не раскрываюць, але абяцаюць, што здзівяць гледачоў адразу двума цікавымі праектамі, адным з якіх будзе мюзікл. З нецярпеннем чакаем прэм'еры, бо не толькі артысты засумавалі без гледачоў, але і гледачы без артыстаў.
Кацярына ІЛЬЮШЭНКА.
