Алена Талкач і Аляксандр Басько.
У карціннай галерэі раённага краязнаўчага музея адкрылася выстава рэпрадукцый работ Мікалая Рэрыха «Святая Русь», прадстаўленая Сібірскім Рэрыхаўскім грамадствам. Знатакам мастацтва з нашага раёна выпала ўнікальная магчымасць бліжэй пазнаёміцца з творчасцю гэтага выбітнага дзеяча рускай і сусветнай культуры.
З нагоды адкрыцця выставы была арганізавана сустрэча, у якой прынялі ўдзел прадстаўнікі творчай грамадскасці горада. У мерапрыемстве таксама ўдзельнічалі куратар выставы Алена Талкач, госць з Новасібірска, прадстаўнік Сібірскага Рэрыхаўскага Таварыства Аляксандр Басько. Размова ішла аб асобе вялікага гуманіста і яго творчай спадчыне.
Мікалай Рэрых - сапраўдны грамадзянін свету. Ён нарадзіўся ў Расійскай імперыі, жыў у Еўропе і ЗША, Індыі. У гісторыю сусветнай культуры ўвайшоў як мастак, філосаф, пісьменнік, археолаг. Ён з'яўляецца аўтарам ідэі і ініцыятарам першага ў гісторыі міжнароднага дагавора аб абароне культурнай спадчыны, вядомага як «Пакт Рэрыха». Разам са сваёй жонкай Аленай ён стварыў філасофска-рэлігійнае вучэнне «Жывая этыка», у якога і сёння нямала прыхільнікаў ва ўсім свеце.
Мастацкая спадчына Мікалая Рэрыха складае некалькі тысяч работ у галіне станковага, манументальнага (фрэскі, мазаіка) і тэатральна-дэкарацыйнага жывапісу. Многія раннія яго карціны прысвечаны гісторыі Старажытнай Русі, старажытнарускім помнікам культуры. Рэпрадукцыі некаторых з іх прадстаўлены на выставе.
Удзельнікі мерапрыемства адзначалі, што старажытнарускі цыкл Рэрыха мае такую ж каштоўнасць для Беларусі, як і для Расiі. У ім - агульная для нашых народаў гісторыя.
У экспазіцыі выставы ёсць рэпрадукцыі карцін, якія добра знаёмы аматарам жывапісу: «Заморскія госці», «Перамога», «Снягурка і Лель» і іншыя.
Дарэчы, 9 кастрычніка споўніцца 146 гадоў з дня нараджэння Мікалая Рэрыха. У прыхільнікаў яго творчасці ёсць унікальная магчымасць адзначыць Дзень нараджэння мастака ў асяроддзі якасных рэпрадукцый яго карцін.
Выстава працягне сваю працу да 25 кастрычніка.
Наталля Пархомчык.