Настаўнік матэматыкі Зоркаўскага КПК дзіцячы сад-базавая школа Валянціна Філіпенка і дырэктар Дуброўскай сярэдняй школы Валянціна Андрэева.
Крочыць свята па краіне... Якое? Па-сапраўднаму народнае - Дзень настаўніка. Вялікая педагагічная сям'я, а таксама вучні і іх бацькі па традыцыі адзначаць яго ў першую нядзелю кастрычніка.
Напярэдадні Дня настаўніка прайшоў цэлы шэраг святочных мерапрыемстваў. У мінулую сераду прадстаўнікі ўстаноў адукацыі сабраліся ў раённым Цэнтры культуры, дзе адбылося ўрачыстае мерапрыемства, прысвечанае Дню настаўніка. З надыходзячым святам педагогаў павіншавалі старшыня райвыканкама Віктар Каляда, начальнік упраўлення адукацыі, спорту і турызму Уладзімір Губарэвіч, старшыня раённага камітэта прафсаюза работнікаў адукацыі і навукі Таццяна Шавель.
Падчас цырымоніі ўзнагароджання на сцэну паднімаліся настаўнікі, работнікі дзіцячых дашкольных устаноў, устаноў дадатковай адукацыі, спартыўныя трэнеры і прафсаюзныя актывісты. Шмат заслужаных узнагарод, шмат кветак, шмат апладысментаў…
А 1 кастрычніка ў Беларускім дзяржаўным акадэмічным музычным тэатры прайшло абласное свята «Дзень настаўніка–2020». Удзел у ім прыняла дэлегацыя нашага раёна, у склад якой увайшло 30 работнікаў сферы адукацыі.
У гэты дзень больш чым 100 педагогам сталічнага рэгіёна былі ўручаны ўзнагароды рознай вартасці. У ліку ўзнагароджаных - прадстаўнікі нашага раёна. Граматай Міністэрства адукацыі ўзнагароджана педагог-арганізатар сярэдняй школы №4 горада Мар'іна Горка Аксана Брывач, граматай Мінскага абласнога выканаўчага камітэта - выкладчык Мар'інагорскага дзяржаўнага аграрна-тэхнічнага каледжа Уладзімір Кулыба. Падзяка старшыні Мінаблвыканкама была ўручана дырэктару Свіслацкай сярэдняй школы Таццяне Селівонец.
У пятніцу ўрачыстае мерапрыемства, прысвечанае Дню настаўніка, прайшло на рэспубліканскім узроўні з удзелам Кіраўніка дзяржавы. Пухавіцкі раён прадстаўляла дэлегацыя з дзевяці чалавек, у ліку якіх былі ветэраны педагагічнай працы.
Праца педагогаў - гэта інвестыцыі ў будучыню. Такая думка ў перадсвяточныя дні не раз гучала на розных узроўнях. А будучыня павінна ўсяляць упэўненасць.
Наталля Пархомчык.