Валянціна Сянькевіч.
Жыхарка вёскі Бахаравічы Валянціна Сянькевіч трымае ў руках фатаграфіі апор ліній электраперадач і трансфарматарнай падстанцыі да рэканструкцыі паветранай лініі і, здаецца, да канца не можа паверыць, што ўсе праблемы з электраэнергіяй для вяскоўцаў засталіся ў мінулым. У вёсцы yовыя лініі электраперадач з'явіліся ў сярэдзіне лета.
- У апошнія два гады ў нас была вельмі складаная сітуацыя з электраэнэргіяй. У многіх суседзяў згарэла бытавая тэхніка. Часта прападала электрычнасць, аднойчы Новы год мы сустракалі без святла, — расказвае Валянціна Пятроўна. - З гэтай праблемай мы ездзілі на прыём да старшыні райвыканкама, неаднаразова звярталіся ў Пухавіцкі РЭС і Навапольскі сельвыканкам. Вельмі хочацца выказаць словы падзякі ад усіх жыхароў за праведзеную працу старшыні райвыканкама Віктару Каляда, начальніку Пухавіцкага РЭС Сяргею Хадыка і старшыні Навапольскага сельвыканкама Ліліі Брандт.
Вёска Бахаравічы - гэта дзве вуліцы, 135 домаўладанняў, у якіх зарэгістраваны 61 чалавек. Рэканструкцыя паветранай лініі 0,38 кВ у вёсцы праведзена ў рамках рэалізацыі дзяржаўнай праграмы «Камфортнае жыллё і спрыяльнае асяроддзе». Са сродкаў дзяржбюджэту было выдзелена 819 тысяч рублёў.
Рэканструкцыя пачалася ў сакавіку. У ліпені аб'ект быў здадзены. Будаўніцтва выконвала падрадная мантажная арганізацыя ААТ «Белсельэлектрасеткабуд» філіял СМУ-7. Работы выконваліся сумесна з сіламі Рудзенскага вытворчага ўчастка Пухавіцкага РЭС, які ўзначальвае Сяргей Аўсянік.
— Дзякуючы рэканструкцыі мы палепшылі электразабеспячэнне і якасць пастаўляемай электраэнергіі для жыхароў вёскі, — адзначае галоўны інжынер Пухавіцкага РЭС Аляксандр Жыгалка. - Драўляныя апоры ліній электраперадач, якія былі пабудаваны яшчэ ў 1970-я гады, замянілі жалезабетоннымі. Сеткі на драўляных апорах праектавалі па нормах і правілах тых гадоў. У тыя часы не было такой разнастайнасці бытавой тэхнікі, як зараз. Лініі электраперадач не былі на гэта разлічаны, таму і здаралася частае адключэнне электраэнергіі.
Акрамя гэтага, паветраныя лініі, якія праходзілі па зямельных участках і дастаўлялі шмат нязручнасцяў мясцовым жыхарам, былі заменены кабельнымі. Гэта прыкметна павялічыла электрабяспеку.
У вёсцы пасля рэканструкцыі з'явіліся і тры новыя трансфарматарныя падстанцыі. Гэта капітальныя будынкі, куды выключана магчымасць траплення волкасці і вільгаці. На падстанцыях ўстаноўлена сучаснае абсталяванне, якое палягчае працу абслугоўваючага персаналу. Прыкметна лягчэй стане працаваць і інспектарам філіяла «Энергазбыт»: прыборы ўліку вынесены на апоры ліній электраперадач.
Кацярына ВЕРНIКОЎСКАЯ.