Занятак вядзе псіхолаг Вольга Князюк.
У верасні 2020 года установе аховы здароўя «Абласны дзіцячы цэнтр медыцынскай рэабілітацыі «Пухавічы» споўнілася 65 гадоў. За гэтыя гады пашырыўся спектр паказанняў для рэабілітацыі, і зараз у цэнтры праводзіцца медыцынская рэабілітацыя дзяцей Мінскай вобласці па сямі профілях: кардыялагічны, пульманалагічны, нефралагічны, артапеда-траўматалагічны, эндакрыналагічны, гастраэнтэралагічны, неўралагічны. Аб тым, як працуе калектыў у гэтым няпростым для ўсіх медыцынскіх работнікаў годзе, расказвае намеснік галоўнага ўрача Святлана Гайкова:
- У пачатку бягучага года ў структуры неўралагічнага профілю было выдзелена 15 ложкаў для дзяцей, якія маюць псіханеўралагічныя захворванні. Пры неабходнасці пастаяннага догляду за дзіцём бацькам прадастаўляецца магчымасць сумеснага знаходжання. Для таго, каб працаваць у дадзеным кірунку, былі ўдасканалены праграмы рэабілітацыі: распрацаваны новыя методыкі, закупляецца новае абсталяванне, ў штат установы дадаткова прыняты вузкія спецыялісты: лагапед-дэфектолаг, псіхолаг, рэабілітолаг.
Сёлета на базе нашай установы быў арганізаваны і паспяхова пачаў функцыянаваць амбулаторны міжраённы Цэнтр ранняга ўмяшання для дзяцей да 3-х гадоў з Пухавіцкага і Чэрвеньскага раёнаў.
Неабходнасць стварэння такіх цэнтраў прадыктавана павелічэннем у апошнія гады ў Беларусі колькасці дзяцей, якія маюць патрэбу ў ранняй комплекснай рэабілітацыі, прыярытэтны кірунак якой - прафілактыка дзіцячай інваліднасці, а таксама медыка-сацыяльная дапамога сем'ям, якія выхоўваюць дзяцей з абмежаванымі магчымасцямі. Адкрыццё цэнтра на нашай базе - гэта рэальная магчымасць акцэнтаваць увагу бацькоў на выяўленне праблем, каб як мага раней пачаць працаваць з дзіцем.
Заняткі праводзіць інструктар-метадыст фізічнай рэабілітацыі Алена Іваніцкая.
Задача, якую ставяць перад сабой нашы спецыялісты, - аказанне міждысцыплінарнай рэабілітацыйнай дапамогі дзецям ранняга ўзросту з парушэннямі псіхаматорнага развіцця або рызыкай яго узнікнення.
Мы дапаможам вызначыць узровень развіцця дзіцяці, выявіць індывідуальныя асаблівасці і патрэбы вашага малога, навучыць бацькоў спосабам і прыёмам ўзаемадзеяння з дзіцём. Загадчык цэнтрам ранняга ўмяшання лекар-рэабілітолаг Ала Карнякова. З дзецьмі працуюць лагапед Вольга Корж, інструктар-метадыст фізічнай рэабілітацыі Алена Іваніцкая, псіхолаг Вольга Князюк.
Трапіць у цэнтр ранняга ўмяшання можна як па кірунку лекара, так і самастойна (пытанні па тэлефоне 6-67-78).
Нельга не сказаць аб тым, што ў сувязі з пандэміяй каранавiруса цэнтр рэабілітацыі «Пухавічы» на два месяцы прыпыняў сваю працу. Зноў прымаць дзяцей на рэабілітацыю мы пачалі 6 ліпеня. З улікам эпідэміялагічнай сітуацыі ў правілы прыёму ў цэнтр унесены змены: абавязкова патрабуецца даведка аб адсутнасці кантактаў з хворымі каранавiруснай інфекцыі. Усім работнікам і наведвальнікам у абавязковым парадку вымяраецца тэмпература. Персанал цэнтра і настаўнікі выконваюць масачны рэжым. Максімальна размежаваны патокі руху пацыентаў з розных аддзяленняў на лячэнне, ў сталовую, на ўрокі і культурна-забаўныя мерапрыемствы.
Дзеці хутка прывыкаюць да дадзеных патрабаванняў. У хлопцаў фармуецца новы стыль паводзін, пры якім нармальным з'яўляецца захаванне гігіены рук, прынцыпаў сацыяльнага дыстанцыявання і захавання асабістай прасторы. Мы вучым дзяцей быць уважлівымі і да сябе, і да навакольных.
Алена ШАНТЫКА.